La pandemia algama cifres de récor: 269 casos nuna xornada y 210 de media na selmana última

Asturies, en fase 2 modificada dende’l xueves, ta algamando cifres de récor nesta segunda fola de la pandemia de COVID-19, superando ampliamente en contaxos a la primera. El sábadu rexistráronse 269 casos, con una media diaria na selmana última que pasó de 150 a 210, y la tasa de positividá’l domingu llegó al 8,1 por cientu tres dos xornaes siguíes pasando del 5 por cientu.

La selmana pasada arrancó nel país con 6.352 positivos confirmaos por PCR y finó, a falta de confirmase los datos oficiales, con 8.431, según los datos comunicaos de manera diaria pola Conseyería de Salú. Son 1.468 contaxos nuna sola selmana, una media de 210 diarios, que confirmen un ascensu imparable: 39, 46, 52, 83, 92, 92 y 150 nes anteriores.

El sábadu amás rexistróse la cifra récor del tol andanciu de COVID-19, superando los 229 del día 9, qu’al empar superara los 146 del 20 de marzu. Un total de 269 persones dieron positivu por coronavirus SARS-CoV-2 el sábadu tres la realización de 3.864 pruebes PCR, lo qu’asitió la tasa de positividá de la xornada nel 6,96 por cientu.

Esti indicador aumentó ayeri hasta’l 8,1 por cientu, superando per tercer xornada’l 5 por cientu que marca la Organización Mundial de la Salú (OMS) como referencia de tener controlada la pandemia. No que respeuta’l númberu d’afeutaos, quedó tamién na cifra importante de 255, mentes que’l vienres los contaxos foron 207.

N’Asturies hai agora 258 hospitalizaos, 35 n’UCI y 223 en planta, cuando’l xueves había 211, en concreto 32 y 179, de manera respeutiva. No que respeuta a les muertes, hai que llamentar 6 nes trés xornaes últimes, dos homes de 88 y 77 años y cuatro muyeres de 90, 86, 77 y 64.

Llendes a les visites a hospitales

Otra manera, el Salú llendó les visites a los hospitales pa protexer del coronavirus a les persones ingresaes por otres malures. Namái se permiten a pacientes pediátricos, a aquellos altamente vulnerables y a los que necesiten cuidaos paliativos, que  recibirán el máximo acompañamiento posible, siempre con un máximu d'un familiar que nun presente síntomes respiratorios o fiebre.

En postoperatorios y en partos va permitise la presencia de familiares nes 24 hores primeres. N'otros casos de persones ingresaes que, por circunstancies esceicionales, requieran l'acompañamientu, analizaráse cada situación de mou individual.