La media diaria de casos de COVID-19 na selmana última xube a 272

El vienres Asturies rexistró la cifra más alta de positivos de tol andanciu nuna mesma xornada, 381 –con una tasa de positivá del 9,87 por cientu, tamién récor–, que baxó a 288 el sábadu y a 247 el domingu. Na selmana última la media diaria de casos nuevos de COVID-19 xubió a 272, cuando na anterior foi de 210.

Nestos siete díes hebo un total de 1.905 afeutaos pol coronavirus SARS-CoV-2, al pasar de 8.442 –tres les correiciones feches dende Salú al incorporar positivos diagnosticaos en díes anteriores– a 10.347. Signifiquen 272 contaxos diarios, confirmando un ascensu imparable que llevó al Gobiernu a tomar güei midíes más drástiques como’l zarru del país dende’l miércoles: 39, 46, 52, 83, 92, 92, 150 y 210 nes selmanes anteriores.

El vienres amás Asturies vivió la xornada con más contaxos de la pandemia, un total de 381. Nesa xornada la tasa de positivá foi del 9,87 por cientu, la cifra tamién más alta, cuasi’l doble de lo que marca la OMS como indicador de que la pandemia ta controlada, un 5 por cientu.

El domingu ésta baxó hasta’l 6,16 por cientu, mentes qu’ayeri, con 247 positivos y 3.160 pruebes PCR feches, quedó nel 7,8 por cientu.

Venti finaos

Nestos trés díes últimos hebo que llamentar la muerte de 20 persones, que ponen el total de la serie en 416. Son 10 homes de 93, 86, 74, 73, 73, 72, 67, 67, 62 y 45 años y 7 muyeres de 101, 96, 95, 93, 89, 81 y 80, a los que Salú sumó 3 más de díes anteriores.

No que respeuta a hospitalizaciones, hai anguaño 48 persones na UCI, 8 más que'l xueves, y 387 en planta, 117 más.

Na semeya, tubos d'análisis pa facer pruebes de COVID-19.