La media diaria de casos de COVID-19 pasó de 92 a 150 na selmana última

El vienres, con 229 contaxos, Asturies vivió la xornada con más positivos por coronavirus de tol andanciu de COVID-19, con una diferencia amplia cola anterior cifra. La media diaria de casos nuevos aumentó na selmana última de 92 a 150, una tendencia peligrosa que va llevar al Gobiernu a tomar midies "drástiques".

A falta de conocer los datos oficiales de la COVID-19, les comunicaciones diaries de la Conseyería de Salú permite conocer que na selmana última Asturies pasó de tener 5.916 casos confirmaos por PCR a 6.963. Esta situación eleva la media diaria de positivos a 150 depués de dos periodos de 7 díes calteníendose en 92.

Les anteriores, mentes, la cantidá de contaxos medios diarios foi 39, 46, 52 y 83. Con estos datos pue vese la evolución ascendente de la pandemia nesta segunda fola que va llevar a tomar "midíes drástiques nueves" al Gobiernu, según confirmó’l presidente Adrián Barbón esta mañana nun mensaxe a la ciudadanía per redes sociales, "por ser los datos peores de la pandemia".

Superóse’l 5 por cientu de positividá

El vienres 20 de marzu numberosos casos en residencies prendíen toles alarmes n’Asturies, con 146 positivos, nunes xornaes, les primeres del confinamientu, onde la cantidá de contaxos s’asitiaba al rodiu del mediu centenar. Esta cifra superóse ampliamente’l vienres, cuando Salú comunicó 229.

El sábadu’l rexistru nun foi muncho meyor, con 229 casos, mentes que’l domingu baxó yá a 160, la tercer más alta del andanciu. A ello hai que sumar tases de positividá del 6,5 por cientu los dos primeros díes y del 5,34 por cientu, el domingu, superando per primer vegada’l 5 por cientu que marca l’Organización Mundial de la Salú (OMS) como avisu de que la pandemia empieza a tar descontrolada.