Cuasi dos centenares de contaxos esti xueves

Una muyer de 96 años finó na xornada. Ponga dexa de tar n'alerta naranxa, mentes que Samartín sigue una selmana más.

Los datos oficiales de COVID-19 sumaron 199 positivos nuevos a la serie, polo que'l total de casos confirmaos por PCR algama la cantidá de 7.700. Ún correspondía al miércoles, lo que significa qu'ayeri se diagnosticaron 198.

El Serviciu de Salú del Principáu d'Asturies (SESPA) fixo 4.152 pruebes PCR, polo que la tasa de positividá s'asitió nel 4,76 por cientu, cifra asemeyada a la del día anterior, 4,70 por cientu. D'esta forma'l país acumula dos díes perbaxo del 5 por cientu que marca la Organización Mundial de la Salú (OMS) como llende pa tener controlada la pandemia.

Ayeri hebo que llamentar la perda d'otra persona con coronavirus SARS-CoV-2. Trátase d'una muyer de 96 años usuaria d'un centru residencial sociosanitariu, la muerte númberu 371 dende qu'entamó l'andanciu.

No que respeuta a les hospitalizaciones, hai 12 persones más na UCI (un total de 32) y 16 en planta (179), siendo la tasa d'ocupación del 6,77 por cientu. El númberu d'ingresaos ta xubiendo de manera alarmante nes selmanes últimes, pasando de 117 el xueves pasáu a los 211 actuales.

52 casos

Samartín del Rei Aurelio va siguir hasta'l miércoles n'alerta naranxa al restrixar 52 casos na selmana última. Ponga, que nun tuvo nengún, dexa esti estáu nel que se caltienen Xixón, Ḷḷena, Trubia (Uviéu), Mieres y Avilés.