La incidencia de COVID-19 nos 14 díes últimos xube a 247

El llunes rexistráronse 210 casos nuevos y finó una muyer de 88 años usuaria de residencia.

"Siendo sinceru, los datos son mui esmolecedores", afirmó Adrián Barbón nun videu asoleyáu esta mañana en redes sociales dende Presidencia con un mensaxe dirixíu a la población y tamién a la hostelería énte la más que previsible toma de midíes nueves nel aconceyamientu del xueves del Comité de Siguimientu de la Normalidá Nueva p'analizar la situación epidemiolóxica una selmana depués de la entrada a la fase 2 modificada. La incidencia acumulada n'Asturies xubió a 247 casos nos 14 díes últimos cada 100.000 habitantes, mentes que la media estatal ye de 312, con autonomíes que yá raspien el 1.000.

A falta de que s'asoleyen los datos oficiales d'ayeri de la COVID-19 n'Asturies, la Conseyería de Salú comunicó 210 positivos tres la realización de 3.107 pruebes PCR, polo que la tasa de positividá foi del 6,75 por cientu. Ye la cuarta xornada siguida na que se supera'l 5 por cientu que marca la Organización Mundial de la Salú (OMS) como llende pa tener controlada la pandemia.

Na xornada perdió la vida una muyer de 88 años afeutada pol coronavirus SARS-CoV-2, la víctima 378 dende l'entamu del andanciu. Mentes, hebo 47 ingresos hospitalarios, lo que pon el total en 287, con una tasa d'ocupación del 9,12 por cientu.