Finó l'académicu y escritor Xosé Bolado

"Perdemos a un compañeru col que siempre se podía cuntar, a un home comprometíu, cabal, atentu y cariñosu, y sobre manera, a un amigu lleal que nunca escaeceremos", llamenta l'ALLA.

La institución académica comunicó esta tarde la muerte de Xosé Manuel Bolado, académicu y escritor nacíu nel 1946 n'Uviéu y vecín de Xixón que desendolcó la parte final de la so carrera como docente en Madrid. Yera miembru de númberu y una persona mui querida.

Llicenciáu en Filosofía y Lletres (Filoloxía Románica), tuvo venceyáu al movimientu de reivindicación llingüística dende la década de los 70. Entró na Academia de la Llingua Asturiana nel 1988 y fíxose cargu na entidá de la so especialización, los estudios lliterarios, y promovió la revista 'Lliteratura', de la que foi direutor del 1990 al 2017.

Nestos años tamién tuvo al cargu de la materia de 'Lliteratura Asturiana' en diferentes cursos y niveles de formación entamaos pola ALLA, collaboró col 'Lletres Asturianes' y punxo ponencies y comunicaciones nes Xornaes Internacionales d'Estudiu. "Cola muerte de Xosé Bolado, l'Academia de la Llingua Asturiana y tolos que formamos parte d'ella perdemos a un compañeru col que siempre se podía cuntar, a un home comprometíu, cabal, atentu y cariñosu, y sobre manera, a un amigu lleal que nunca escaeceremos. Sibi tibi terra levis", espresaron.

Nel tarrén lliterariu, nel 1988 espublizó col Atenéu Obreru de Xixón, que presidió y onde formó la coleición poética 'Deva', la 'Antoloxía poética del Surdimientu' (1989), una amuesa de poemes de diez autores de les dos xeneraciones del Surdimientu que, nes sos pallabres, "quier ser la esbilla, amás que muestra, una metáfora d’una lliteratura, d’un procesu de normalización lliteraria decisivu na nuesa hestoria moderna". Como antólogu y críticu lliterariu ye autor tamién del prólogu, les notes y la bibliografía de 'Escritores en llingua asturiana' (1992), de la coleición 'Grandes autores asturianos' de la editorial Hércules-Astur, de dos llibros de Rosario Acuña, del fascículu 'Lliteratura asturiana contemporanea' de la 'Historia de Asturias' del diariu 'La Nueva España,' y de los poemarios 'Conxura contra la decadencia' (2002), 'Na estación de los relevos' (2006) y el billingüe 'La bona intención / La buena intención' (2012), entre otros trabayos, recibiendo nel 2014 el VIII Premiu Timón pa escritores n’asturianu y eonaviego qu'entregaba l'Asociación Cultural L'Arribada.

Sociu y collaborador d'Iniciativa pol Asturianu

Tamién espresó'l so pesar pola perda Iniciativa pol Asturianu, que quixo reconocer de Bolado "el so compromisu llingüísticu col idioma qu’aplicó en toles xeres nes que tuvo relevancia y representación". Sociu de la entidá, recordó que "foi un collaborador dende los entamos de la nuesa organización y un entusiasta del idioma que con amabilidá y simpatía siempres defendió".

L'equipu que conforma Asturies.com llamenta fondamente tamién esta perda tan grande pa les lletres asturianes y manda un fuerte abrazu a familiares y amigos.

Semeya obra de José Javier González.