L’ALLA homenaxa a Bolado cola espublización d’un llibru y una llectura de poemes

Esti sábadu va tener llugar nel salón d’actos de la uvieína Biblioteca d’Asturies ‘Ramón Pérez de Ayala’ un actu d’homenaxe a Xosé Bolado, académicu de númberu de l’Academia de la Llingua Asturiana (ALLA) fináu en mayu. La institución asoleya’l llibru ‘N’harmonía. Agora que sigues con nós...’ y entama una llectura de poemes del escritor xixonés.

Xosé Antón González Riaño, reelixíu recién como presidente de l’ALLA, va presidir tamién esti eventu n’alcordanza d’una persona mui involucrada nel trabayu académicu y mui querida nel ámbitu lliterariu asturianu. Entró na institución nel 1988 y fíxose cargu na entidá de la so especialización, los estudios lliterarios.

Tamién promovió la revista 'Lliteratura', de la que foi direutor del 1990 al 2017. Precisamente ‘N’Harmonía: agora que sigues con nós...” inclúi poemes asoleyaos nesta espublización, asina como n’otres de la institución, como ‘Lletres asturianes’ o ‘Lletres lliterariu’.

Amás de la presentación d’esti llibru homenaxe, nel actu, con comienzu previstu pal meudía, va entamase una llectura de poemes de Bolado por parte de persones cercanes al autor. María Álvarez Santiago va encargase del acompañamientu musical.

Semeya obra de José Javier González.