Bolado lleva’l VIII Premiu Timón pa escritores n’asturianu y eonaviego

L’autor uviedín Xosé Bolado resultó escoyíu pol xuráu convocáu pola Asociación Cultural L’Arribada como merecedor del VIII Premiu Timón pa escritores n’asturianu y eonaviego. Ésti va entregase’l 27 de setiembre mientres la Vagamar.

 

El Premiu Timón ye un gallardón que nació pa distinguir la trayeutoria lliteraria de los escritores en llingua asturiana y eonaviego, optando pa esta edición los escritores que nacieren nel añu 1.964 o anteriores. Los autores nominaos yeren Lurdes Álvarez, Esther Prieto, Xosé Bolado, Ignaciu Llope, Esther García López y Ánxel Álvarez Llano, siendo escoyíu pol xuráu Bolado. Ésti tuvo integráu por Aurora García Rivas, Alberto Álvarez Peña, Miguel Rojo y Lluis Portal Hevia, y presidíu por Humberto Gonzali.

 

Nacíu nel añu 1946 y académicu, Bolado ye profesor de Lliteratura y estudiosu de la lliteratura asturiana, amás de poeta. Foi autor de la ‘Antoloxía poética del Surdimientu’ (1989); del prólogu, les notes y la bibliografía de ‘Escritores en Llingua asturiana’ (1992); de la coleición ‘Grandes autores asturianos’ de la editorial Hércules-Astur; de dos llibros de Rosario Acuña; y del fascículu ‘Lliteratura asturiana contemporania’ de la ‘Historia de Asturias’ del diariu ‘La Nueva España’. Tamién tien espublizaos trabayos y artículos diversos sobre’l panorama actual de les lletres asturianes y los llibros de poesía ‘Conxura contra la decadencia’ (Llibros del Pexe, 2002),  ‘Na estación de los relevos’ (Llibros del Pexe, 2006) y, en formatu billingüe, ‘La bona Intención’ (Impronta Editorial, 2012).

 

Bolado suma d’esta forma’l so nome al palmarés d’un premiu que yá poseen dalgunos de los meyores escritores asturianos: Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012) y Miguel Rojo (2013). La entrega del VIII Premiu Timón va tener llugar el 27 de setiembre, mientres la Vagamar qu’entama L’Arribada xunto, col II Premiu Timón de Cultura Asturiana, que ganó la Xunta pola Defensa de la Llingua Asturiana, y el V Premiu Timón p’autores asturianos en castellano, que llevó Carmen Ruiz-Tilve. Esti gallardón consiste nuna obra del escultor y ceramista xixonés Jesús Castañón.

Semeya obra de José Javier González.