Xosé Bolado presenta ‘La bona intención’, primer llibru n’asturianu de la editorial Impronta

L’Atenéu Obreru de Xixón va acoyer esti martes la presentación del llibru ‘La bona intención / La buena intención’, de Xosé Bolado. Esta obra, billingüe, ye la primer espublización n’asturianu de la editorial Impronta.

En concreto, esti poemariu del autor uviedín ye’l primer llibru de la coleición ‘Carta blanca’ qu’Impronta dedica a la lliteratura en llingua asturiana. La editorial xixonesa ye un proyeutu aniciáu en xunu por Marina Lobo, direutora de la yá desapaecida Llibros del Pexe (1989-2007), col oxetivu de dar cabida a autores asturianos de tolos xéneros. Pablo Texón va encargase de presentar ‘La bona intención / La buena intención’ mañana, a les 20 hores, na sede social del Atenéu Obreru, asitiada na cai Cuadonga númberu 7, primeru izquierda.

Según espliquen dende Impronta, la obra “ye una sutil aventura introspectiva. Les ventanes qu’abre esti llibru allumen un espaciu que ye personal pero que ye’l de cualesquiera. El llector va facer nes sos páxines un viaxe al corazón de les hores y les coses, al infatigable y firiente cursu de los díes, a los intorgables daños y engaños que’l pasu y el pesu del tiempu aveza a dexar en nós. Somos de fixo una suma de negaciones y afirmaciones y nada como les pallabres pa ser quien a interpretar los nuestros silencios”. Nacíu n’Uviéu nel añu 1946, llicenciáu en Filoloxía Románica, profesor de Secundaria en Madrid y académicu de l’ALLA, Bolado ye autor d’estudios y ediciones sobre lliteratura asturiana y castellana, ente los que destaquen ‘Antoloxía poética del Resurdimientu’ (Atenéu Obreru de Xixón, 1989) y los cinco volúmenes de la ‘Obra Reunida de Rosario de Acuña y Villanueva’ (KRK, 2007–2009). Tamién espublizó poesía en llingua asturiana y castellana, y foi presidente del Atenéu Obreru de Xixón y cofundador y direutor actual de la Coleición Deva de Poesía.