Cúmplese un añu del primer casu de COVID-19 n’Asturies

|
Cúmplese un añu del primer casu de COVID-19 n’Asturies

El 29 de febreru del 2020 el Gobiernu comunicaba la detección del primer casu de COVID-19 n’Asturies, la enfermedá causada pol coronavirus SARS-CoV-2 que taba ximelgando China y asustaba a Europa dende Italia, anque paecía entovía llonxana. Un añu depués, Asturies rexistra 135 casos diarios de media na selmana última.

Foi l’escritor Luis Sepúlveda, chilenu del 70 años afincáu en Xixón, el primer afeutáu nel país pol coronavirus. Quedaba ingresáu nel Hospital Universitariu Central d’Asturies (HUCA), d’onde yá nun saldría, al finar por esta enfermedá’l mes y mediu depués, el 16 d’abril.

El presidente Adrián Barbón dio esi 29 de febreru una rueda de prensa xunto col conseyeru de Salú, Pablo Ignacio Fernández Muñiz, y otres autoridaes sanitaries. Dos selmanes depués la Organización Mundial de Salú (OMS) declaraba la pandemia y, poco depués, el Gobiernu estatal, l’estáu d’alarma y el confinamientu domiciliariu pol aumentu de casos.

Esti añu foi’l más duru que vivieron delles xeneraciones d’asturianes y asturianos, tanto n’aspeutos de salú como económicos. Un total de 43.534 dieron positivu en pruebes de diagnósticu d'infeición activa, mayoritamiente PCR, en COVID-19, anque la cantidá que garró la enfermedá foi entá mayor, y perdieron la vida 1.771 persones según los datos oficiales, magar que la cifra real supera les 2.000 muertes.

Datos últimos

Esta selmana detectáronse 944 contaxos, pasando de 42.590 a 43.534 –los datos oficiales aumenten esta cifra en 6 positivos más, hasta 43.540–, polo que sigue la tendendencia de baxada, anque a un ritmu lentu. Son 135 casos nuevos diarios de media na selmana última, cuando na anterior esta cantidá foi 154.

Nesta tercer fola la evolución d’esti datu foi la siguiente: 78, 101, 167, 292, 421, 482, 383, 226, 154 y los 135 actuales. Nel fin de selmana detectáronse 355 positivos: 159 el vienres, 95 el sábadu y 101 ayeri.

La tasa de positivida que se rexistró estos díes foi de 6,87 por cientu, 6,06 por cientu y 5,97 por cientu, de manera respeutiva. A 7 díes, el sábadu esti porcentaxe quedaba nun 5,44 por cientu –cola actualización xube a 5,51 por cientu–.

Hai que llamentar estos díes 18 muertes, 10 homes y 8 muyeres, nengún residente en centru de mayores: 5 el vienres, 7 el sábadu y 6 ayeri. Dende qu’entamó l’andandiu finaron cola enfermedá causada pol coronavirus SARS-CoV-2 un total de 1.772 persones –sumóse al acumuláu una muerte non contabilizáu de díes anteriores–.

Nestos momentos tán hospitalizaos 292 pacientes con confirmación o sospecha de COVID-19, a los qu’hai que sumar 111 ingresaos na UCI. Son 10 y 3 menos que’l xueves, de manera respeutiva.

Na semeya, Concepción Saavedra, xerente del SESPA; Fernández Muñiz; Barbón; Rafael Cofiño, direutor xeneral de Salú Pública; y Ismael Huerta, xefe del serviciu de Vixilancia Epidemiolóxica, na rueda de prensa na que se comunicó'l primer casu de COVID-19 nel país.

Contador Estadistiques