El Gobiernu entama un plan pa desaniciar el plumeru de La Pampa

Destina 440.000 euros a esti fin.

El conseyeru d’Infraestructures, Ordenación del Territoriu y Mediu Ambiente, Fernando Lastra, asistió güei a la puesta en marcha del Plan d’Aición pal Control y Desaniciu de la Cortaderia selloana, conocida popularmente como plumeru de La Pampa. La primer actuación tuvo llugar ayeri en Cuaña, escoyéndose una finca particular averada al ríu Navia, daqué que, a xuiciu de Lastra, “pon de manifiestu la necesidá de que la sociedá civil s’implique nel desaniciu".

El Gobiernu encargó a Tragsa la execución del plan, que pretende, amás d'acabar colos exemplares esistentes, consolidar los terrenos lliberaos pa evitar que los vuelvan invadir otra vegada. La cantidá destinada a tal fin ye de 440.000 euros.

El plumeru de La Pampa ta consideráu como una de les especies de flora invasora más peligroses pol so grau d’espansión y l’impautu económicu y ambiental que xenera. Les zones más afeutaes n’Asturies son veres d’autopistes y víes de tren, los polígonos industriales, les árees periurbanes, los rellenos de canteres, los terrenos portuarios y los vertederos, siendo la mayor vía d'espardimientu l’autovía del Cantábricu.

Les actuaciones previstes sofítense nel 'Protocolo de actuación contra el plumero en Asturias', ellaboráu en collaboración col Departamentu de Botánica de la Universidá d’Uviéu, qu’ufierta una visión estratéxica pa planiar la prevención, control y posible desaniciu de la especie. Esti documentu, que contó cola participación de Tomás Emilio Díaz González, caderalgu de Botánica de la institución académica, detalla les intervenciones que tienen que facese según les condiciones de cada mediu, garantizando asina una mayor efectividá y el menor costu ambiental.

Protestes na Xunta Xeneral

La problemática del plumeru de La Pampa y de les especies invasores, tanto vexetales como animales, vien siendo denunciada dende l'añu pasáu por #LluchandoPolaSoberanía. Esti coleutivu tien entamaes aiciones nel terrén contra la planta xunto con coleutivos vecinales, asina como charres y una protesta frente a la Xunta Xeneral.

Tamién editó un 'Manifiestu por una Asturies llibre de plumeru La Pampa y especies invasores'. El documentu amuésase críticu col Gobiernu, calificando de "febles" los intentos de control fechos dende l'Alministración.

Na semeya, Lastra y Díaz González.