#LluchandoPolaSoberanía llevó la problemática de les especies invasores a la puerta de la Xunta

|
#LluchandoPolaSoberanía llevó la problemática de les especies invasores a la puerta de la Xunta

El coleutivu fixo un actu informativu y de protesta na so campaña centrada nel plumeru de La Pampa coincidiendo col Alderique d'Orientación Política Xeneral.

Un piñu de persones escolingó una pancarta na puerta de la Xunta Xeneral na que se lleí 'Plumeru de La Pampa, fuera d'Asturies... Pola defensa del territoriu y la soberanía ambiental!' xunto a dos dibuxos d'una vaca arrodiada por esta planta ornamental que nos años últimos ye bien visible per toda Asturies. D'esta forma, #LluchandoPolaSoberanía pretende denunciar esta situación y la incapacidá de los gobernantes énte’l xorrecer per tol país d'ésta y otres especies invasores.

Tamién se procedió al repartu ente la xente cientos de guíes básiques contra’l plumeru La Pampa, asina como la entrega del 'Manifiestu por una Asturies llibre de plumeru La Pampa y especies invasores' a tolos grupos parllamentarios. D'igual forma remitiéronse per rexistru copies a tolos grupos municipales de tolos conceyos asturianos "buscando un posicionamientu claru y pidiendo la declaración de 'conceyu llibre de plumeru La Pampa y especies invasores'", amás de solicitar la ufierta d'información a vecines y el desendolcu de planes de desaniciu y collaboración "baxo unes premises de creación de puestos de trabayu dignos y apostando por un modelu productivu apegáu al mediu, dando soluciones al despoblamientu rural".

 

 

Contador Estadistiques