Foro dulda del plan del Gobiernu pa desaniciar el plumeru de La Pampa

"Naide nun se cree que con 450.000 euros al año se pueda finar con esta plaga en siete años", afirma Carmen Fernández Gómez.

El xueves echaba a andar en Cuaña el Plan d’Aición pal Control y Desaniciu de la Cortaderia selloana, conocida popularmente como plumeru de La Pampa. L'oxetivu ye, amás d'acabar colos exemplares esistentes nel país d'esta planta invasora, consolidar los terrenos lliberaos pa evitar que los vuelvan a ocupar otra vegada, dalgo que dende Foro consideren inviable col esfuerciu económicu que se va facer dende'l Gobiernu.

“N''Asturies teníemos a últimos del añu pasáu mas de 500 hectárees invadíes pol plumeru, polo que naide nun se cree que con 450.000 al añu se pueda desaniciar esta plaga en siete años. Suena a bomba preeleutoral pa que-y españe al siguiente Gobiernu”, apunta la diputada y vocera de Mediu Ambiente basándose nos datos aportaos pol propiu Executivu.

Fernández Gómez anuncia iniciatives parllamentaries cola fin de conocer los detalles de planificación y control d'actuación del proyeutu entamáu dende la Conseyería d'Infraestructures, Ordenación del Territoriu y Mediu Ambiente, con Fernando Lastra al frente. “Foro solicita na Xunta Xeneral copia completa del Plan de Control y Desaniciu del Plumeru asina como la comparecencia del conseyeru pa qu'esplique a los asturianos el so conteníu", añadió al tiempu que criticó'l "escurantismu" del Gobiernu con dichu plan.

Na semeya, Lastra, nel centru, da esplicaciones a Manuel Diez y Joaquín Moya, de la empresa Tragsa; a Tomás Emilio Díaz González, caderalgu de Botánica de la Universidá d'Uviéu; y a Benigno Fernández Fano, vicecoseyeru de Medio Ambiente, mientres la primer actuación del plan en Cuaña.