Una campaña busca finar cola presencia del plumeru de La Pampa y d’otres especies invasores

|
Una campaña busca finar cola presencia del plumeru de La Pampa y d’otres especies invasores

‘Plumeru La Pampa, fuera d’Asturies. Pola defensa’l territoriu y la soberanía ambiental’ ye’l nome de la campaña entamada por #LluchandoPolaSoberanía pa concienciar de los peligros de les especies invasores pal nuesu ecosistema. El domingu comenzó en Xixón con una retirada d’exemplares en terrenos de la ZALIA.

La iniciativa #LluchandoPolaSoberanía escoyó esti llugar por consideralo un “exemplu paradigmáticu de la especulación urbanística y l'agresión a les formes tradicionales de vida y producción”. Asina, un piñu de moces y mozos fixeron una llimpieza simbólica de plumeru de La Pampa y lleóse un ‘Manifiestu por una Asturies llibre de plumeru La Pampa y especies invasores’ como primer iniciativa de les munches previstes.

“La invasión del plumeru La Pampa ye, amás d’un desastre mediuambiental, un exemplu paradigmáticu de la voluntá nula de xestión de quienes malgobiernen esti país dende les instituciones del Principáu”, espliquen en dichu documentu. Sobre los efeutos negativos que tien esta especie pal ecosistema autóctonu apuntaron el desplazamiento d’especies vexetales y animales, al empar que la degradación “lo mesmo de terrenos degradaos afectaos pola especulación urbanística, como d’espacios protexíos pol so valir ecolóxicu, asina como con un valir potencial pa la esplotación agro-ganadera”.

“Los intentos de control del plumeru que se ficieron nel pasáu amosaron ser febles y, nin tan siquiera cuando s’almitió que se paraben los escasos trabayos d’erradicación por falta de presupuestu, se fizo por señalar y pidir responsabilidaes al culpable principal de la invasión: el Ministeriu de Fomentu español”, critiquen sobre la postura del Gobiernu asturianu. Por ello, demanden tanto al Executivu como a los conceyos enfotu pa finar cola plaga d’esta especie, ensin escaecer otres animales o planetes invasores como podríen ser el cangrexu colloráu americanu de ríu o la caña, ente otros munchos.

Contador Estadistiques