La campaña de desaniciu del plumeru de La Pampa arranca esti añu con actuaciones tamién nel centru del país

|
Trabayos tercer fase plan plumeru de La Pampa na AS-II

La tercer fase del Plan de Desaniciu del Plumeru de La Pampa n’Asturies arrancó con actuaciones tamién nel centru del país y aiciones pilotu n’AS-II ente Uviéu y Llugones. Les dos anteriores centráronse en conceyos de la mariña d'oriente y l’occidente, con siguimientu agora de los trabayos fechos dende’l 2018.

L’oxetivu d’esta camapaña ye algamar una situación de control de la especie invasora y desendolcar actuaciones de mantenimientu periódiques cola fin de torgar la tendencia natural d’espardimientu d’esta planta invasora qu’empieza a florecer esti mes. La tercer fase, que va tener una duración de trés años, inclúi intervenciones nel centru y plantega a los conceyos nos que s’intervino nos dos primeros años que llocalicen les parceles o exemplares yá trataos en fases anteriores que requieran una consolidación del tratamientu pa evitar el so brotu, y aiciones pilotu n’AS-II, yá que les zones próximes a les carreteres son les de mayor espansión de la especie.

En concreto, van probase delles actuaciones, coordinaes ente les direiciones xenerales de Mediu Natural y Planificación Rural, y Infraestructures Viaries y Portuaries, pa comprobar la competencia ente especies autóctones como gorbices o piornos y el plumeru. Les árees trataes monitorizaránse pa comprobar la efeutividá y l’ameyoramientu de los trabayos fechos.

Nesta campaña tamién s’intensifiquen los llabores en zones protexíes de la Rede Natural d’Asturies, siempre con tratamientos mecánicos y manuales que garanticen la compatibilidá de les midíes colos valores medioambientales. La reserva natural parcial de la ría de Villaviciosa, el paisaxe protexíu de Cabu Peñes o la zona d’especial conservación del Nora son dalgunes nos que se va trabayar.

Siete años

Esta estratexa ta coordinada con una iniciativa estatal del Ministeriu pa la Transición Ecolóxica y el Retu Demográficu, que se recueye nel Plan de Desaniciu del Plumeru de La Pampa n’Asturies redautáu nel 2017 pol Gobiernu asturianu en collaboración cola Universidá d’Uviéu y qu’entamó a executase nel 2018. La iniciativa tien un horizonte temporal de siete años pa torgar la espansión de la especie, sobre manera n'oriente y occidente, zones anguaño menos afeutaes.

Na semeya, el direutor xeneral del Mediu Natural y Planificación Rural, David Villar, y la direutora xeneral d'Infraestructures Viaries y Portuaries, Esther Díaz, ayeri na visita a los trabayos nun tramu de l'AS-II.

Contador Estadistiques