El Gobiernu comunica a Ciudadanos que nel 2021 nun se va tratar la cuestión de la oficialidá

La vocera Susana Fernández Álvarez treslladó'l xueves de manera telemática al equipu negociador del Gobiernu un documentu coles “llinies naranxes” p’apoyar los presupuestos. Ente elles ta’l refugu oficialidá del asturianu y gallego-asturiano, cuestión que’l Gobiernu confirmó a Ciudadanos que nun se va tratar nel 2021, según la versión treslladada en rueda de prensa por esta formación.

Aparte de nun dar derechos a los falantes de les dos llingües propies d’Asturies –“nun avanzar na cooficialidá”, apuntó–, que la vocera d’esta formación presentó como un trunfu, tamién avanzó que la Federación Socialista Asturiana (FSA) aceptó nun xubir los impuestos. En realidá’l presidente Adrián Barbón yá treslladara nel alderique d’orientación política na Xunta Xeneral la so disposición a tratar la reforma del Estatutu esta llexislatura, pero non agora como demanda Podemos o Asturies pela Izquierda (Izquierda Xunida-IAS), dando prioridá a la crisis sanitaria.

"Que nun pueda dicir Barbón que nun tien una alternativa centrada, razonable, lliberal, europeísta y que namái-y queda l'alternativa de los populismos y la estrema izquierda, como fai Sánchez", espresó’l coordinador autonómicu Ignacio Cuesta tres el primer aconceyamientu, el vienres, sobre los presupuestos. Les otres “llinies naranxes” que propón Ciudadanos na negociación son la tresformación de l’Alministración pública, l’impulsu de la “Asturies escaecida”, ayudes a la conciliación y fondos de compensación p’autónomos y pymes, espresó Fernández Álvarez.

Na imaxe, un momentu del aconceyamientu del vienres, con Fernández Álvarez en primer planu a la derecha xunto con Cuesta. Semeya obra d'Armando Álvarez.