Barbón recuerda a Ciudadanos que cola oficialidá nel programa "xubimos en 6 diputaos"

La vocera Susana Fernández Álvarez tornó a sacar nel alderique d'orientación política'l bilordiu del costu de 70 millones d'euros.

"Señor Barbón, el nuesu ámbitu sociosanitariu ta mui necesitáu y merez qu'invertamos nél, igual l'educativu, el sanitariu o'l de les infraestructures. Somos plenamente conscientes de que la capacidá presupuestaria ye limitada, pero mire, yo-y doi'l nuesu apoyu nesti mesmu momentu pa lliberar tol dineru que supondría la cooficialidá que vusté defende, y que nel meyor de los casos, según l'Academia de la Llingua, seríen 20 millones d'euros, anque otros xuben a cifres muncho mayores, como 73", espresó Fernández Álvarez, que dixo darréu que "sinceramente espero que nun sía" una prioridá pa los asturianos.

"Que vusté comprara soga nes eleiciones pasaes nun nos pue llevar a asumir esi gastu innecesariu y extemporaneu", afirmó la vocera de Ciudadanos, que considera que se pue defender la llingua "ensin una cooficialidá obligatoria". "Pa esti tema nun cuente con nós", añadió al tiempu que recordó que nun tien nenguna otra llinia collorada n'otros asuntos.

"La FSA nun se metió en llíu nengún"

Adrián Barbón respondió-y nuna réplica posterior a Daniel Ripa, voceru de Podemos. "La señora Fernández dixo enantes que nos metiéramos nun llíu" cola oficialidá, principió'l presidente, que negó que fora asina: "La FSA nun se metió en llíu nengún. Nel 32 Congresu del partíu, llegó una enmienda de les agrupaciones llocales –por cierto'l partíu que más militantes movilizó nuna votación n'Asturies, presenciales amás– y esi Congresu decidió cambiar la posición tradicional del partíu de manera democrática. Incorpórose nel programa eleutoral y, nun sé en qué llíu nos metimos, pero xubimos en 6 diputaos".