Barbón tresllada a Vallina la necesidá d’afrontar la reforma del Estatutu nesta llexislatura “pero nun toi d’alcuerdu nel tiempu políticu”

|
Ángela Vallina nel alderique d'orientación política

“Nun creo qu’agora, en plena pandemia, cola situación que n’añu, añu y mediu, vamos tener qu’afrontar, el Parllamentu pueda derivar los sos esfuercios a un trabayu de reforma estatutaria”, respondió Adrián Barbón a Ángela Vallina. La vocera d’Izquierda Xunida (IX) demandó al presidente plazos pa modificar la norma.

“Vusté y yo coincidimos nel oxetivu de buscar apoyos necesarios p’algamar una reforma del Estatutu d’Autonomía que permita establecer d’una vez la oficialidá de la llingua asturiana y de la fala nel so ámbitu territorial, tanto pa garantizar la conservación d’ún de los más importantes patrimonios culturales de los que gociamos como pa reconocer los derechos llingüísticos de los sos falantes”, espresó ayeri Vallina na so intervención nel alderique d'orientación política, que considera necesario “empezar a abordar esta cuestión. Nun se nos pue escapar el tiempu y hai que concretar”.

Tres nun tratar Barbón l’asuntu na réplica, la vocera de la coalición Asturies pela Izquierda (IX-IAS) insistió: "Establezamos güei un calendariu orientativo pa eses reformes del Estatutu. La derecha diz qu’esto ye secundario y la entruga racional ye, ¿por qué? ¿Impide la reforma estatutaria la consecución de llogros materiales pa la sociedá? ¿Impide avanzar nos asuntos qu’acabamos de mencionar? La respuesta ye, evidentemente, non. Nun consume nin recursos nin enerxía política qu’haya que destinar a la realidé socioeconómica, non. Al contrario, impulsa les polítiques sociales. La derecha asturiana, non asina n’otres partes del Estáu, tien un prexuiciu sobre la reforma estatutaria y sobre la oficialidá de la llingua que nun esiste amás na sociedá asturiana, ye falso. La derecha estrema simplemente odia la pluralidá, yá que ye la materia prima de la democracia".

Darréu añadió que la reforma del Estatutu “pue facer posible’l blindaxe de los derechos y polítiques sociales pa que les xeneraciones del futuru tengan garantizaos por llei na so norma básica les polítiques que nos fixeron salvar vides nesta crisis. El futuru del Estatutu d’Asturies tien que falar de salú, de blindaxe de los servicios públicos destinaos a les polítiques sociales, tien qu’afitar que los derechos sociales son un requisitu indispensable pa una convivencia ordenada, xusta y próspera, ye dicir, pal nuesu futuru común. En definitiva, hemos d’incorporar los derechos de la tercer xeneración como yá fixeron otres comunidaes autónomes”.

“Y la nuesa llingua ye un valor cultural enorme que, como toles facetes de la cultura, impulsará ensin dulda la recuperación económica”, siguió Vallina, que considera que nun entainar cola reforma estatutaria “debilitaría a Asturies como coleutividá y como suxetu políticu dotáu de toda fuercia”.

“Nun hai que tener complexos”

Tres falar d’identidá, y recordar les diferentes postures con respeuto al idioma del PP gallegu y asturianu, Barbón reivindicó la llingua asturiana y el gallego-asturiano “porque creo que nun hai que tener complexos”, destacando la importancia d’emplegalu na Cámara “como fixi con normalidá” na so intervención del martes nel alderique d’orientación política. Sobre la reforma apuntó que “comparto la idea xeneral” de Vallina –“hai qu’afrontala”, aseguró–, “pero nun toi d’alcuerdu nel tiempu políticu”.

“Nun creo qu’agora, en plena pandemia, cola situación que n’añu, añu y mediu, vamos tener qu’afrontar, el Parllamentu pueda derivar los sos esfuercios a un trabayu de reforma estatutaria”, declaró al tiempu que puntualizó que “sí creo que los partíos deberíamos empezar a trabayar cómo querríamos reformar l’Estatutu, y el Gobiernu d’Asturies tamién tará observando”. Asina comprometióse a que’l so Executivu “abrirá esi marcu de reflexón” –y tamién na Federación Socialista Asturiana (FSA)–, pa pidir darréu al restu de grupos “altura de mires, esto ye, buscar consenso y non imposiciones de mayoríes. Ye importante que síamos conscientes de que tenemos que consolidar el marcu xurídicu d’Asturies pa les décades próximes, que nun ye cuestión sólo de lo qu’unos queremos y otros non. L’Estatutu debe de sirvir pa que gobiernen tanto les dereches como les izquierdes”.

Pa finar repitió que “yo sí que creo que nesta llexislatura hai que falar d’ello, habrá qu’afrontalo, pero agora mesmo creo que la prioridá tien que ser la sanitaria y facer frente a la crisis económica y social que se nos vien enriba”.

“Yá pue haber consensu pa la oficialidá”

Nel so turnu últimu, Vallina, falando de la derecha, tornó a insistir en que “la oficialidá yá toca y pue haber un consensu yá pa ello”, pa depués criticar que “siempre nos falen del costu, pero nunca del dineru que se pierde d’Europa si l’asturianu fora una llingua oficial”, en referencia a les pallabres de la vocera de Ciudadanos, Susana Fernández Álvarez, qu’enantes sacara a rellucir el bilordiu de los 70 millones d'euros de gastu. Llueu, tres amosar la so disposición a llegar a alcuerdos col Gobiernu, apuntó que “l’Estatutu, cuando toque, pero lo que nun podermos perder de vista ye consolidar los derechos sociales nél, pa que pueda gobernar la derecha y la izquierda pero los derechos sociales de la ciudadanía tean consolidaos y non al azar de quién gobierne”.

Barbón garró’l guante y coincidió con ella en qu’ello “ye una cuestión non menor”. Asina, refirióse al Estatutu d’Autonomía como un “escudu social protector dende’l puntu de vista xurídicu”.

Contador Estadistiques