Ciudadanos pon el refugu a la oficialidá como condición na negociación presupuestaria cola FSA

"Que nun pueda dicir Barbón que nun tien una alternativa centrada, razonable, lliberal y europeísta", diz Ignacio Cuesta.

El martes tuvo llugar la primer xunta del Gobiernu y la Federación Socialista Asturiana (FSA) con Ciudadanos de cara a la negociación presupuestaria. Na mesma'l partíu na oposición punxo enriba la mesa delles "llinies naranxes" qu'anunció esta mañana'l so coordinador autonómicu: "Non a la xuba d'impuestos, non a la cooficialidá del asturianu y una apuesta nidia y direuta por ayudar a les pequeñes empreses y los autónomos", amás d'inversión pública.

Foi nun Café Telemáticu con militantes nel que Cuesta participó xunto a la secretaria de Comunicación, Ana Reguero. "Que nun pueda dicir Barbón que nun tien una alternativa centrada, razonable, lliberal, europeísta y que namái-y queda l'alternativa de los populismos y la estrema izquierda, como fai Sánchez", añadió.

Na imaxe, aconceyamientu del martes, colos representantes de Ciudadanos a la derecha y Cuesta sentáu nel centru. Semeya obra d'Armando Álvarez.