Camuda la tendencia: la media de contaxos diarios baxa de 482 a 383

Selmana a selmana foi medrando dende la llegada del 2021, nel que s'entró con 78 casos. Actívense les midíes en Llaviana, endurécense en Ḷḷena y Ayer, y prorróguense en Grau.

Depués d'un mes d'ascensu, la curva de la tercer fola entama a descender. Esta fin de selmana, a falta de la espublización de los datos oficiales de la COVID-19 d'ayeri, rexistráronse 921 casos nuevos, repartíos en 412 el vienres, 255 el sábadu y 254 el domingu, polos 1.185 de la pasada.

En febreru entrábase con 37.239 positivos acumulaos y, colos datos últimos comunicaos pola Conseyería de Salú, zarróse ayeri con 39.917 –l'actualización aumenta la cantidá en 4 casos más hata los 39.921–. Son 2.678 contaxos polos 3.372 de la selmana anterios, 383 diarios de media.

Dende'l periodu del 28 d'avientu al 3 de xineru esti indicador nun aparó de medrar. Rexistrábase 101 polos 78 de la selmana anterior, siguiendo con 167, 292, 421 y 482 hasta los actuales 383.

La tasa de positivida tamién baxa

A la espera de los datos oficiales, el sábadu la tasa de positividá quedaba nun 9,64 por cientu, siguiendo tamién una tendencia descendente. Estos trés díes últimos asitióse nun 9,68 por cientu'l vienres, 7,35 por cientu'l día siguiente y 8,50 por cientu ayeri.

No que se refier a les muertes, hebo un total de 19, trece muyeres y seis homes: 9 el vienres, 4 el sábadu y 6 ayeri, ente los que taba un sanitariu del Hospital de Xove de 26 años, Pablo Riego. Dende qu'entamó l'andanciu perdieron la vida cola enfermedá causada pol coronavirus SARS-CoV-2 un total de 1.609 persones.

Hai nestos momentos hospitalizaos 606 pacientes con confirmación o sospecha de COVID-19, 75 más que'l xueves. Mentes, na UCI tán ingresaos 122, 3 menos que nesa xornada.

Nivel d'alerta 4+

Llaviana ye'l decimonovenu conceyu qu'entra en riesgu estremu, con zarru perimetral y les midíes del nivel d'alerta 4+ actives dende güei. Éstes van siguir en Grau, que suma la segunda prórroga de restricciones, hasta'l día 22.

Mentes, l'aumentu de casos en Ḷḷena y Ayer obliguen a Salú a endureceles dende mañana nestos dos conceyos. Al igual qu'asocede n'Avilés, Castrillón y Corvera, la hostelería va tener que pesllar tamién les terraces y nun va haber actividaes deportives y culturales con públicu, ente otres midíes.

Na semeya, la Casa Conceyu de Llaviana.