Sigue la baxada de casos: 233 contaxos esti llunes

La tasa de positividá asitióse nun 6,76 por cientu con 5.338 pruebes de diagnósticu d'infeición activa feches na xornada. Actívense les restricciones dures en Ḷḷena.

A falta de la espublización de los datos oficiales de la COVID-19, la Conseyería de Salú informó de la detección ayeri de 233 casos nuevos –l'actualización aumenta en 9 los positivos hasta los 242–. Son 21 menos que'l domingu y el cuartu día con baxada de casos tres los 428 del xueves.

Tamién ameyora la tasa de positividá, que s'asitió nun 6,76 por cientu pol 8,50 por cientu del día anterior. A 7 díes ayeri esti porcentaxe quedaba nun 9,32 por cientu –l'actualización báxala ayeri a un 8,73 por cientu–, mentes que'l sábadu taba nun 9,64 por cientu.

Na xornada hebo que llamentar 6 muertes: trés muyeres de 88, 79 y 73 y trés homes de 86, 85 y 81, de los que nengún vivía en residencia. Dende qu'entamó l'andanciu finaron un total de 1.615 persones cola enfermedá causada pol coronavirus SARS-CoV-2.

Tán hospitalizaos 581 pacientes con confirmación o sospecha de COVID-19, 25 menos que'l domingu. Siguen ingresaos na UCI 122.

Pieslle de terraces

Activáronse güei en en Ḷḷena –mañana va facelo n'Ayer– les restricciones más dures pol aumentu de casos nel conceyu magar les midíes de nivel d'alerta 4+. Al igual que n'Avilés, Castrillón y Corvera, per 14 díes la hostelería namái va poder trabayar la venta a domiciliu o a recoyer en llocal, y les actividaes culturales y deportives nun van poder desendolcase con públicu.

Otra, manera, güei entró a valir la prórroga de dos selmanes en Grau. Pa consultar la situación de tolos conceyos y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, La Pola Ḷḷena. Semeya obra d'Osmio-4 baxo llicencia CC BY-SA 3.0.