Siguen baxando los contaxos: 226 diarios de media na selmana última

Hai 14 díes esta cifra yera de más del doble, 482, descendiendo llueu a 383. Grau sal del riesgu estremu y va dexar el zarru perimetral un mes depués de la so aplicación.

Sigue la tendendencia descendente na tercer fola de la pandemia de COVID-19. La selmana pasada rexistráronse 1.518 contaxos polos 2.678 de l'anterior, pasando de 39.921 a 41.502 –los datos oficiales redúcenlo en 7 pa dexalo en 41.495– nel total del andanciu, y esta fin de selmana detectáronse 546: 217 el vienres, 191 el sábadu y 138 ayeri.

D'esta forma los positivos diarios foron, de media, 226 nes 7 xornaes últimes, cuando la selmana anterior ascendió a 383. Dende que principió la tercer fola la evolución foi la siguiente: 78, 101, 167, 292, 421, 482, 383 y los 226 actuales.

La tasa de positividá tamién ta en tendencia descendente, siendo a 7 díes el sábadu del 7,2 por cientu –l'actualización de los datos baxólo ayeri a un 6,98 por cientu–. L'indicador diariu'l vienres quedó en 7,18 por cientu, el sábadu en 7,86 por cientu y ayeri en 6,13 por cientu.

Hai que llamentar 20 muertes esta fin de selmana: once homes y nueve muyeres, de la que dos residíen en centros de mayores, col vienres como peor día con 8, mentes que'l sábadu hebo 7 y ayeri, 5. Dende qu'entamó l'andanciu finaron cola enfermedá causada pol coronavirus SARS-CoV-2 1.667 persones –los datos oficiales sumen una muerte de díes previos non contabilizaos–.

El númberu d'hospitalizaos con confirmación o sospecha de COVID-19 asciende a 537, mentes que tán ingresaos na UCI 131 pacientes. Son 11 y 6 más que'l xueves.

Dende'l 12 de xineru

Grau ye'l quintu conceyu en salir del nivel d'alerta 4+, depués de Llanes, Noreña, Salas y, dende güei, Valdés. Mañana va llevantase'l zarru perimetral y les restricciones vixentes nos 14 conceyos que siguen en riesgu estremu, esto ye, Uviéu, Cangas del Narcea, Gozón, Xixón, Mieres, Samartín del Rei Aurelio, Siero, Carreño y Llaviana, amás d'Avilés, Corvera, Castrillón, Ḷḷena y Ayer, con midíes especiales al tener un nivel de tresmisión del coronavirus SARS-CoV-2 mui alta.

El casu de Grau ye especial, al tar con restricciones dende'l 12 de xineru polos biltos de Navidá, enantes inclusive de que'l Gobiernu entamara l'actual modelu d'aplicar zarros perimetrales por conceyos. Tuvo tola hostelería pesllada hasta'l día 26, cuando paso a tener les midíes del 4+, y anguaño taba na metá de la primer prórroga.

Pa consultar la situación de tolos conceyos y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, Grau.