La incidencia, tres algamar el so picu, desciende per primer vez dende'l 3 de xineru

Baxó de 656 a 652 el miércoles. El xueves, xornada na que se confirmó la prórroga de les restricciones en Noreña y Xixón, termina cola detección de 425 contaxos y 10 finaos.

El día siguiente na que se superó la incidencia acumulada más alta de tola pandemia de COVID-19, que se diera'l 18 de payares con 650 casos cada 100.000 habitantes, frayóse per primer vegada la tendencia ascendente d'esti indicador na tercer fola. El 3 de xineru xubía de 81 a 84, y dende esi día nun paró de medrar hasta'l miércoles, cuando baxó de 656 a 652.

Los contaxos caltiénense esta selmana en cifres asemyaes. Ayeri la Conseyería de Salú detectó 425 –los datos oficiales sumen 6 más que ponen el total en 431– con una tasa de positividá del 8,92 por cientu al facer 6.299 pruebes de diagnósticu d'infeición activa, polos 395 –los datos oficiales sumaron ún más, 396– del día anterior na qu'esti porcentaxe s'asentó nun 10,46 por cientu con 5.257 tests realizaos.

A 7 díes ye del 9,84 por cientu, cifra entovía alloñada del 5 por cientu que marca la Organización Mundial de la Salú (OMS) como llende pa tener controlada la pandemia. Como comparanza, hai una selmana taba nun 10,73 por cientu.

Un total de 10 persones perdieron la vida cola enfermedá causada pol coronavirus SARS-CoV-2: siete homes de 89, 87, 87, 82, 81, 79 y 71 años y trés muyeres de 98, 98 y 91. Dende qu'entamó l'andanciu yá s'acumulen 1.590 muertes –l'actualización acumula 20 previes non contabilizaes–.

Hai hospitalizaos 531 pacientes con confirmación o sospecha de COVID, 34 menos que'l miércoles. Mentes, la UCI tien 125 ingresaos, 8 más que'l día anterior.

Tamién Mieres y Samartín del Rei Aurelio

La Conseyería de Salú comunicó la prórroga del nivel d'alerta 4+ per 14 díes más en Noreña, onde terminaben mañana, y en Xixón, con restricciones hasta'l domingu. Esti mesmu día finen tamién les midíes pa frenar l'espardimientu del coronavirus en Mieres, pero hasta esta tarde nun se decidió esti aumentu de dos selmanes, que se da tamién en Samartín del Rei Aurelio.

Otra manera, Llangréu y Llaviana apaecen como posibles conceyos n'entrar en riesgu estremu nel casu de nun ameyorar los sos datos estos díes. Pa consultar la situación de tolos conceyos y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, control policial na estación de tren pa vixilar el cumplimientu del zarru perimetral en Xixón.