Asturies yá suena nel Festival Interceltique de Lorient dedicáu al país

|
Cuarteto Monteavaro, Muñalén & Rodrigues nel chigre-tienda d'Asturies nel LI Interceltique de Lorien

El bon tiempu acompaña y los habitantes d’An Oriant y visitantes, munchos desplazaos dende Asturies, empiecen a disfrutar del ambiente del certame. Yá arrancó’l LI Festival Interceltique de Lorient, Année des Asturies, y la gaita asturiana suena nesta población bretona que se convierte estos díez díes na capital del mundu celta.

“Hai mui bon ambiente”, respondía al otru llau del teléfonu a Asturies.com, que la selmana próxima va desplazase hasta Breizh, Iñaki Santianes, responsable de la delegación asturiana, que lleva dende’l martes n’An Oriant cuidando tolos detalles pal desembarcu esta mañana de los primeros de los más de 200 representantes del país d’esti añu nel certame. “Tenemos bones espeutatives. La venta d’entraes va a bon ritmu y los pronósticos del tiempu pa tola selmana son mui bonos”, rellata.

El sonía de la gaita yá ta presente nes cais de la ciudá. El pabellón d’Asturies tamién abrió les sos puertes y recibe a los primeres persones atrayíes pola música y la gastronomía asturiana, bien conocida polos llocales.

Especialmente atractiva pa los bretones ye la sidra natural asturiana, con una gran demanda en toles ediciones nes qu’Asturies presentó chigre. Nesta ocasión lleváronse 500 caxes pa servir nun espaciu que se va complementar con un bar-tienda nel que van tar a la venta productos asturianos pa consumir nel llugar o llevar a casa, allugamientu onde van desendolcase delles prebes estos díes.

Un escenariu, un puestu de Turismu d’Asturies pa ufrir cualquier tipu d’información sobre’l país pa potenciales turistes y una esposición completen el pabellón d’Asturies. Trátase de ‘Llabor’, del artista llavianés Ricardo Villoria, con 50 semeyes d’entornos rurales y industriales, asina como retratos de personaxes que componen l’universu personal del creador, traxes tradicionales reinterpretaos y dos pieces audiovisuales, formando un tou que da una mirada vanguardista y tresgresora de la cultura tradicional asturiana.

Amás de l’animación de cai con La Garrapiella y el Cuarteto Monteavaro, Muñalén & Rodrigues, la primer xornada va contar col protagonismu de L-R. El dúu formáu por Leticia Baselgas y Rubén Bada participa esta nueche en Le Kleub, un espaciu pa les tendencies nueves que nun pierden de vista la tradición, col enfotu d’atrayer a la mocedá, xunto colos llocales Plantec y Alan Le Roux.

Mac Crimmon y la Gran Parade des Nations Celtes

Fabián Fernández y Javier Menéndez González va poner mañana una clase maestra de gaita en compañía del gallegu José Manuel López ‘Josele’ a les 10 hores en Le Palais y la Banda Gaites Llacín, representante asturianu na Gran Parade des Nations Celtes y nel Horizons Celtiques –les vieyes nueches máxiques que caltienen l’estadiu del Lorient FC como sede que van principiar esti día– xunto col Grupo Folklórico Trebeyu, va protagonizar el primer desfile pel centru de la villa. A les 14.30 va tener llugar el XXXV Trophée Mac Crimmon cola participación de los gaiteros Fernando Vázquez, Jaime Álvarez, Daniel Meré y Diego Lobo, que van enfrentase a otros cuatro músicos gallegos.

El conciertu de Mapi Quintana, ‘Música pa tornar páxaros’, dedicáu al músicu Elías García, fináu nel 2019, va ser l’apertura asturiana oficial del certame. Va tener llugar en Le Théâtre a les 21 hores y la cantante, xunto con César Latorre, Sonia Cartón, María Sanmiguel, Thomas Welvaadt y Juanjo Díaz, va ufrir un repertoriu compuestu a costafecha pal Interceltique.

A les 22 hores, na carpa La Bretagne Invite, va animar al públicu’l Breizh Asturies Project xunto colos maneses Clash Vooar y los bretones SpouM. Trátase d’una fusión de fest-noz y nueche en danza comandáu por Fañch Loric, Nicolas Radin, Leticia Baselgas, la propia Quesada, Mathieu Sérot, Tibo Niobé, Julien Le Mentec y Tudi Cariou.

El domingu al meudía va entamar el gran eventu del certame, la Gran Parade des Nations Celtes, el gran desfile qu’axunta a miles de persones nes casi d’An Oriant. De nueche, Rodrigo Cuevas va tar en Le Kleub con MOX y Alan Le Roux.

Va siguir sonando la música asturiana na cai y nel pabellón los díes siguientes. Santianes va participar el miércoles a les 21.30 en Le Palais na Gran Soirée de la Cornamuse xunto col escocés Fred Morrison y los bretones Dash 4 en 1, y el xueves va tener llugar la Gran Nueche d’Asturies nel escenariu principal del Interceltique, L’Amphi-Espace Jean-Pierre Pichard, el vieyu Espace Marine que pierde la carpa pa convertise nun escenariu al aire llibre.

La Grande Soirée des Asturies va tar protagonizada por Llan de Cubel y Hevia, y nél nun va faltar l’alcordanza d’Elías García. Un conciertu mui esperáu n’An Oriant.

Nes últimes xornaes van tocar Cerezal, el vienres a les 22 hores en La Bretagne Invite xunto con Skolvan y Talec/Noguet Quartet y el sábadu en Le Kleub a les 14.30 hores colos irlandeses Perfect Friction; y el tríu asturbretón Muga’l domingu a les 14 hores nun destacáu final con otros siete grupos. Mentes, Silvia Quesada y José Manuel Tejedor participen nel ‘Celtic Odysée’ xunto con otros músicos d’otres naciones celtes nesti interesante proyeutu musical que va tener dos sesiones, el vienres y el sábadu, a les 21 hores en Le Théâtre.

Programación del pabellón d’Asturies

Amás de la programación oficial del festival, tolos díes va haber un conciertu nel pabellón d’Asturies. La Garrapiella y el Cuarteto Monteavaro, Muñalén & Rodrigues toquen esta nueche, pa siguir mañana y el domingu con Eva Tejedor y Les Pandereteres, y Llevólu’l Sumiciu.

El restu d’actuaciones son les siguientes: ¿AÚ? (llunes); ¿AÚ? y Rubén Alba y Nel de Purnea (martes); Rubén Alba y Nel de Purnea, y Algaire (miércoles); Algaire (xueves); y Urso Dakoff y Baxel (vienres y sábadu). Tolos conciertos tienen un preciu de 9 euros.

Tamién va haber espaciu pa la lliteratura n’asturianu con charres, llectures y meses redondes del día 11 al 13 p’amosar en Breizh el bon momentu que viven les nueses lletres. Van participar Pablo X. Suárez, Solinca Turbón, María García Díaz y Xaime Martínez.

Visites institucionales

Una gran representación l’asturiana nesti Année des Asturies que se va completar con un sofitu institucional de máximu nivel. Asina van acudir al Interceltique’l presidente Adrián Barbón; la conseyera de Cultura, Política Llingüística y Turismu, Berta Piñán; y el direutor xeneral de Cultura y Patrimoniu, Pablo León.

“Ye mui importante pa nós l’apoyu de l’Alministración. La so presencia equí ayudará a dar más visibilidá al eventu”, agradez Santianes, que tresmite tamién la satisfaición de la organización pola asistencia del máximu dirixente del país, un xestu que nun ye habitual. N’otres ocasiones acudieren ministros o conseyeros de Cultura –nunca nengún asturianu– del país al que se dedica esa edición, cola única esceición de Michael D. Higgins, presidente d’Éire, nel 2014.

Na semeya, el Cuarteto Monteavaro, Muñalén & Rodrigues toca frente al chigre d'Asturies esta tarde.

Contador Estadistiques