El presidente d’Éire acude al Interceltique de Lorient nel añu dedicáu al so país

El Festival Interceltique de Lorient, que va contar con una delegación asturiana importante, dedica la so edición númberu 44 a Éire. El so presidente Michael D. Higgins acude en representación del país a esta cita.

Esta situación contrasta cola asocedío l’añu pasáu, cuando’l certame intercélticu más importante del mundu tuvo como territoriu convidáu a Asturies. Nesa ocasión, el representante del Gobiernu asturianu en Breizh foi Alejandro Calvo, viceconseyeru de Cultura, dalgo que dexa bien nidio la diferente importancia que se da a esti eventu n’Asturies y na República d’Irlanda.

La delegación asturiana nun llega’l númberu del añu pasáu, como ye lóxico, pero cuenta con una representación importante que va actuar en dellos escenarios de la ciudá dende güei hasta’l día 10. La banda de gaites del país que va sonar estos díes peles cais d’An Oriant ye Camín de Fierro, de los conceyos de Proaza, Santu Adrianu y Teberga, mentes que’l grupu de baille que viaxó a Breizh ye Fitoria. Tamién van representar a Asturies nesta edición del Interceltique Asturiana Mining Company, Vrienden, Breizh Asturies Project, Dixebra y Degañan’s. D’igual, forman van competir mañana pol MacCrimmon de solistes de gaita asturiana y gallega los mozos Jesús Fernández –ganador nel 2013–, Álvaro Álvarez, Javier Menéndez y Fabián Fernández.