Barbón va visitar el martes el Festival Interceltique de Lorient

Ye la primer vegada qu'un presidente d'Asturies va tar nel veteranu certame bretón.

Adrián Barbón anunció l'añu pasáu la so presencia nesta edición del Festival Interceltique de Lorient al conocese que diba ser l'Année des Asturies y güei confirmó la so visita'l martes a An Oriant. Una asistencia histórica qu'afita la importancia que-y ta dando nesta ocasión el Gobiernu a esti gran escaparate internacional, l'eventu más importante del mundu al rodiu la cultura celta, con 800.000 asistentes nos sos diez díes de llargor y una gran repercusión mediática.

Nun va ser la única representación importante, yá que Berta Piñán, responsable de Cultura, Política Llingüística y Turismu, va tar mañana na inauguración del pabellón asturianu. Tampoco nunca un conseyeru tuviera nel Interceltique dende qu'Asturies algamara'l reconocimientu de miembru de plenu derechu, nel añu 1987.

Amás, Pablo León, direutor xeneral de Cultura y Patrimoniu, va acudir al actu d'apertura del LI Festival Interceltique de Lorient que va tener llugar a les 19.30 hores d'esta tarde.

Na imaxe, Barbón preside'l Conseyu de Gobiernu d'esta mañana. Semeya obra d'Armando Álvarez.