“A Lorient llevamos una representación musical de lo que ye Asturies güei y de lo que va ser”, esplica Santianes

Asturies va protagonizar una edición clave del Festival Interceltique de Lorient, el cincuentenu primeru, el de la vuelta a una normalidá que perdimos en marzu del 2020 y el del cambiu na direición. Yá entamó la cuenta atrás pa un añu nel que’l país lleva a Breizh “una representación musical de lo que ye Asturies güei y de lo que va ser”, esplica Iñaki Santianes, responsable de la delegación asturiana.

El vienres 5 d’agostu va abrise’l certame con una de les grandes apuestes d’esta etapa nueva, Le Kleub, un espaciu pa les tendencies nueves que nun pierden de vista la tradición, col enfotu d’atrayer a la mocedá, que va acoyer la primera participación asturiana. Va ser L-R xunto colos llocales Plantec y Alan Le Roux, dúu al que van siguir numberosos artistes tanto no que ye la programación oficial del Interceltique como la específica del pabellón d’Asturies, convidáu d’honor d’esta edición, de la que s’encarga la Conseyería de Cultura, Política Llingüística y Turismu.

“A Lorient llevamos una representación musical de lo que ye Asturies güei y de lo que va ser”, apunta un satisfechu Santianes al contar con una delegación de primer nivel compuesta por une 170 persones. A L-R hai que sumar a Cerezal, Rodrigo Cuevas, Muga, Silvia Quesada y José Manuel Tejedor –que participen na iniciativa ‘Celtic Odysée’–, Hevia y Llan de Cubel, amás de la Banda Gaites Llacín y el Grupo Folklórico Trebeyu, ensin escaecer la presencia de Mapi Quintana col so espectáculu d’apertura ‘Música pa tornar páxaros’ en Le Théâtre’l primer sábadu y l’escenariu del pabellón d’Asturies per onde van pasar Llevólu’l Sumiciu, Eva Tejedor & Les Pandereteres, ¿Aú?, Rubén Alba y Nel de Pumea, Algaire, Baxel, La Garrapiella, y Monteavaro, Muñalén & Rodrigues.

“Hai representantes de tolos estilos de música de raigañu, de lo que se ta faciendo agora, les nueves tendencies, ensin dexar de llau les formaciones históriques como pue ser Hevia o Llan de Cubel”, que van protagonizar el xueves 11 la Grande Soirée des Asturies, esto ye, la Gran Nueche d’Asturies, nel L’Amphi-Espace Jean-Pierre Pichard, el vieyu Espace Marine que pierde la carpa pa convertise nun escenariu al aire llibre. Pero nun va haber namái música na representación asturiana n’An Oriant, yá que la gastronomía, la lliteratura, l’arte y la promoción turística van tener el so espaciu nel festival bretón.

Una edición del certame nel que “hai una importante espeutación en Lorient, yá que ye l’añu de recuperación a tolos niveles. L’añu pasáu hebo festival, pero más reducíu, y el cambiu na direición va aportar idees nueves ensin perder la esencia”. Asina, Santianes considera que “pue dicise que la edición dedicada a Asturies va ser l’añu 1 de la nueva era. Finó una etapa de 50 años depués de dellos con Lisardo Lombardía al frente y espero que se recuerde como’l primeru d’un cincuentenariu nuevu al que se dirixa’l festival”.

Importante asistencia asturiana y representación institucional

N’An Oriant hai ganes de festival y n’Asturies, tamién. Amás de los miembros de la delegación son munchos los aficionaos que tán preparando desplazamientu a Breizh pa disfrutar del país y del Année des Asturies nel Interceltique, como pue confirmar Santianes: “Esti añu va ser mui numberosa la presencia asturiana. Tamos recibiendo munches llamaes interesándose n’información pa poder acudir y agospiase”, esplica.

La representación institucional ta asegurada por parte del Gobiernu d’Asturies, anque la ilusión ye de que sía al más altu nivel. Nesi sen, el presidente Adrián Barbón anunciara l’añu pasáu la so intención d’acudir, asistencia qu’entá nun ta confirmada oficialmente y que se conocerá avanzáu’l mes de xunetu.

Na semeya, ambiente na edición pasada del Interceltique.