“Les autoridaes vieron el munchu interés que tien Lorient más allá del romanticismu del festival”, asegura Santianes

La “actitú, profesionalidá y comportamientu” amosada polos artistes y bandes asturianes y el “bon sabor de boca” que dexaron les sos propuestes na organización y el públicu son los aspeutos que más rescampla Iñaki Santianes, responsable de la delegación asturiana, nel LI Festival Interceltique de Lorient. Un certame qu’algamó récor de públicu nel Année des Asturies, con 900.000 visitantes nos sos 10 díes de programación, y que l’añu qu’entra va tar dedicáu a Éire.

Va ser del 4 al 13 d’agostu cuando An Oriant recupere l’espectacular ambiente vivíu esta edición, na que’l bon tiempu ayudó a enllenar les cais onde s’asitia’l festival y la so redolada. Un Interceltique, el de la vuelta a la normalidá, que queda pal recuerdu.

La delegación asturiana, convidada d’honor, ayudó a esti ésitu cola so amplia y variada propuesta. “Toi mui contentu cola actitú, profesionalidá y compartamientu de la xente que viaxó. El nivel que presentaron ellí y la bona calidá de les actuaciones, tanto nel ‘Horizons Celtiques’ como en L’Amphi y otros escenarios, valoráronlu tanto la organización como’l públicu. Dexaron un bon sabor de boca”, aseguró Santianes.

A ello hai que sumar que “llevamos los dos concursos nos que nos presentamos pa casa. Empezamos el primer sábadu col Mac Crimmon y terminamos el segundu col Loïc Raison”, rellata, en referencia a los ésitos del gaiteru Fernando Vázquez Cárcaba y de la banda folk Algaire. Especial foi l’ésitu de los de Mieres, “que fixeron grandes actuaciones y coneutaron mui bien col públicu bretón, que paecía que los conocíen de tola vida, como se pudo ver pela nueche nel conciertu nel Espace Bretagne”.

La presencia d’autoridaes del máximu rangu, como’l presidente Adrián Barbón o Berta Piñán, conseyera de Cultura, Política Llingüística y Turismu, per primer vegada dende qu’Asturies pasara a formar parte como miembru de plenu derechu del Festival Interceltique de Lorient nel 1987, ye otru de los aspeutos positivos d’esta edición, algamando una importante repercusión na prensa llocal los sos alcuentros y alcuerdos col alcalde Fabrice Loher y autoridaes bretones. “Les autoridaes vieron el munchu interés que tien Lorient más allá del romanticismu del festival”, rescampló Santianes, que citó les posibilidaes turístiques, económiques y comerciales que tien el certame.

Ausencia del restorán y futuru

La falta de restorán nel pabellón d’Asturies, asitiáu nun espaciu nuevu nomáu Place des Pays Celtes, recibió crítiques al provocar un menor ambiente na zona y pola perda de la oportunidá de poner en valor la nuesa gastronomía nuna edición na qu’Asturies yera la nación celta protagonista. La conseyería, como confirmó Piñán a Asturies.com, sacó hasta cinco llicitaciones, ensin que se recibiera ufierta nenguna, lo que llevó a cubrir esa ausencia con un chigre con sidra y cerveza asturianes y un puestu de productos del país.

Santianes almite diches crítiques, pero valora l’esfuerciu del Gobiernu y al empar entiende que “son tiempos complicaos a tolos niveles y nun ye fácil arriesgar”, más con un branu de muncha actividá n’Asturies. Sicasí, espera qu’esta situación “sirva d’aprendizaxe pa toos de cara al futuru” y que la repercusión que tuvo esta edición nel país gracies a la presencia de les autoridaes sirva pa “dar a conocer la importancia de Lorient” y anime a hosteleros a apostar pola so presencia nel certame bretón l’añu qu’entra.

Yá de vuelta n’Asturies, al responsable de la delegación asturiana queda-y per delantre zarrar toles cuestiones pendientes d’esta edición enantes d’entamar a pensar na siguiente edición. Un añu, el d’Éire, pal que la organización estudia cambios sobre la distribución del festival y el modelu de los distintos pabellones, cuestiones que van marcar el trabayu futuru y el diseñu de la próxima caravana asturiana a Breizh.

Una vegada zarraes estes cuestiones, Santianes retomará les conversaciones col Gobiernu p’algamar un apoyu col que se cuenta daes les declaraciones feches por Barbón y Piñán tres el so pasu per An Oriant. Calcúlase que pa setiembre, cola intención de tener en payares avanzada la programación asturiana pal Année de l’Irlande nel qu’Asturies nun va pasar desapercibida.

Na semeya, el cartelu d'esta edición, dedicáu a Asturies, nuna de les entraes al recintu del festival.