Asturies va tener prórroga presupuestaria nel 2018

El Gobiernu nun cedió a la pretensión de Podemos d’aumentar n’otros 2 millones la partida pa la escuela de 0 a 3 pa qu’esta fora de baldre pa les families matriculaes anguaño, polo que la formación morada nun retiró la enmienda a la totalidá de los presupuestos. Asturies torna a tener cuentes prorrogaes dos años depués.

La FSA y Izquierda Xunida (IX) –tres llegar esta selmana a un alcuerdu colos socialistes– quedaron solos en defensa del Proyeutu de Llei de Presupuestos Xenerales del Principáu d'Asturies 2018 presentáu pol Gobiernu. Les enmiendes a la totalidá rexistraes por Podemos, PP, Foro y Ciudadanos, que se votaron de forma conxunta, namái tuvieron la oposición de 19 de los 45 diputaos de la Xunta Xeneral na votación celebrada esta mañana, polo que’l 1 de xineru Asturies va entrar en prórroga presupuestaria.

L’atención nel Plenu taba nel posible movimientu de l’Executivu de Javier Fernández de sumar otros dos millones a los dos incorporaos nel alcuerdu con IX, que permitía que les families matriculaes na etapa d’Infantil de 0 a 3 años tuvieron una bonificación del 50 por cientu, y facer qu’ésta sía de baldre total, como quería Podemos. Finalmente ésti nun llegó y la formación morada nun retiró la enmienda a la totalidá presentada, ente acusaciones por dambes partes.

Podemos ufrió finalmente la posibilidá de que’l Gobiernu modificara les cuentes coles sos demandes y que tornara a presentales en marzu, dalgo que los socialistes refuguen.

Na imaxe, Dolores Carcedo, conseyera de Facienda y Sector Públicu mientres l'alderique d'esta mañana. Semeya obra d'Armando Álvarez.