El Gobiernu aprueba’l decretu que regula la prórroga presupuestaria

|
Dolores Carcedo Conseyu de Gobiernu

El Conseyu de Gobiernu dio lluz verde esti xueves al decretu que va regular la prórroga de los presupuestos d’Asturies del 2017 pal añu qu’entra, que va entrar en vigor el 1 de xineru. La FSA nun pudo sacar alantre les cuentes al nun llegar a un alcuerdu con Podemos.

D’alcuerdo colo establecío nel Estatutu d’Autonomía; la Llei Orgánica 8/1980, del 22 de septiembre, de Financiación de las Comunidaes Autónomes; y el Testu Refundíu del Réxime Económicu y Presupuestariu, la prórroga produzse de forma automática siempre que nun haya presupuestos aprobaos el 1 de xineru. En concreto, prorróguense los creitos iniciales de les cuentes del 2017, salvo aquellos que tienen como destín servicios o programes con una vixencia llendada a dichu añu.

Como pasu previu a que’l presupuestu prorrogáu tea operativu, la Conseyería de Facienda y Sector Públicu va analizar los ingresos previstos pal 2018 en función de les previsiones que se deriven de la liquidación del presupuestu d’ingresos del exerciciu prorrogáu, de los recursos procedentes del sistema de financiación autonómica y de la previsión de fondos finalistes. Si d’esta estimación resultase una previsión d’ingresos inferior a los creitos prorrogaos, procederáse a la retención correspondiente.

Mentes, si’l volume de creitos prorrogaos ye insuficiente pa dar cobertoria a los compromisos de gastu, tramitaríense, como primer pasu, les modificaciones presupuestaries necesaries pa complementar estos creitos. Otra manera, el Conseyu de Gobiernu autorizó na reunión de güei, ente otros asuntos, un gastu de 65.490.978 euros destinaos a garantizar la proteición social a los coleutivos más desfavorecíos a lo llargo del añu próximu, con independencia de la prórroga.

Na semeya, Dolores Carcedo, conseyera de Facienda y Sector Públicu.

Contador Estadistiques