El Gobiernu asegura que dos millones más nun seríen suficientes pa la gratuidá de la etapa de 0 a 3 años

Podemos y el Gobiernu siguen ensin averar postures qu’eviten la prórroga presupuestaria. El conseyeru Guillermo Martínez afirmó que los dos millones más que-yos demanda sólo serviríen pa que la etapa de 0 a 3 años namái sía de baldre pa los beneficiarios actuales, mentes que la formación morada ve nello un aniciu.

“Nun se trata de dos millones; dos millones ye lo que cuesta una bonificación del 50 por cientu nes cuotes que paguen agora les families, y otros dos millones, tamos falando de cuatro en too casu, lo que costaría facer gratuita esa etapa educativa de 0 a 3 años pero namái y escluivamente pa esos 3.600 neños y neñes” qu’anguaño tán matriculaos, esplica’l conseyeru de Presidencia y Participación Ciudadana, que considera que de facelo “taríemos xenerando non sólo una desigualdá frente al restu de families que nun tán nel sistema”. En total, son 26.000 potenciales usuarios, afirmó Martínez, que tamién calcó en que sólo 38 conceyos tien implantada esta etapa d’Infantil.

Esta situación ye reconocida por Podemos, qu’entiende que sería’l primer pasu hacia la universalidá y gratuidá total d’un sistema nel que tamién partipen los conceyos. Por ello, ediles de les candidatures de xunidá popular nes que participa la formación morada de les trés conceyos de más población del país, Nuria Rodríguez (Xixón Sí Puede), Rubén Rosón (Somos Oviedo) y David Salcines (Somos Avilés), entamaron esta mañana una comparencia pa defender esta postura.

Votación conxunta de les enmiendes

Nel casu de que’l Gobiernu nun ceda a les pretensiones de Podemos, esti partíu nun va retirar la enmienda a la totalidá al Proyeutu de Llei de Presupuestos Xenerales del Principáu d'Asturies pal 2018 que presentó ayeri, lo que llevaría a una prórroga de les cuentes d’esti añu. Ésta votaríase mañana en Plenu al empar que les otres trés restantes rexistraes na Xunta Xeneral –la del Partido Popular (PP), Foro y Ciudadanos–, según decidió la Mesa de Voceros esta mañana.

Na semeya, Martínez al fondu xunto a Encarnación Vicente, direutora xeneral de Xusticia, na reunión de la comisión téunica d'espertos pa la ellaboración d'un catálogu de restos rellativos a la Guerra Civil y la Dictadura n'Asturies celebrada esta mañana.