El Gobiernu aumenta la inversión social en 92 millones d'euros

La conseyera de Facienda y Sector Públicu, Dolores Carcedo, rexistró un presupuestu de 4.485 millones d'euros. L'asturianu ve aumentada la so partida en 96.377 euros. 

El Conseyu de Gobiernu aprobó'l Proyeutu de Llei de Presupuestos Xenerales del Principáu d'Asturies pal 2018, que suma 259 millones más que l'añu pasáu, aición a la que siguió la entrega del documentu na Xunta Xeneral por parte de Carcedo na Xunta Xeneral pa dar aniciu a la tramitación parllamentaria.

A grandes rasgos, el presupuestu que'l Gobiernu pretende aprobar col apoyu de Podemos y Izquierda Xunida (IX), dalgo qu'entovía ta nel aire, destaca por tener una inversión social de 2.994 millones, 92 más qu'anguaño y un 66,7 por cientu del total, mentes que la inversión productiva llega a los 374 millones, un 21 por cientu superior a les cuentes del 2017. El gastu non financieru asítiase en 3.939 millones.

La cantidá que va recibir la llingua asturiana ye de 1.677.000 euros, 96.377 más qu'esti añu. 70.000 van dir pa la presencia del idioma na RTPA, 10.000 pa l'Academia de la Llingua Asturiana y el restu pa otros apartaos de promoción y normalización.

A Sanidá destínense 1.713 millones, el 38 por cientu del presupuestu. Nesti capítulu destaca l'incrementu nes inversiones n'equipamientos y teunoloxía, que casi se duplican, y les partíes pa les obres d'ampliación y reforma del xixonés Hospital de Cabueñes y les de los centros d'Atención Primaria de Turón, La Pola Ḷḷena y Corvera.

Lloñe de la gratuidá na etapa de 0 a 3 años

El capítulu dedicáu a Educación alcanza los 803 millones, el 18 por cientu del total. Con esta cuantía abordaránse l'apuesta del Gobiernu pola estensión y la calidá del sistema públicu y l'aumentu de la tresferencia a los conceyos, en casi 1,8 millones, p'ameyorar la financiación de la etapa de 0 a 3 años, cantidá que nun va ser suficiente pa la gratuidá d'esti ciclu d'Infantil, como demanda Podemos p'apoyar les cuentes.

Les polítiques de bienestar y cohesión social contarán con 478 millones, un 10,6 por cientu del total de las cuentes. Les necesidaes del salariu social cubriránse con una partida de 120 millones y permitirán incorporar a más de 1.500 families nueves, mentes que'l presupuestu tamién posibilitará la creación de 290 plazas residenciales y otras 56 en centros de día. En política de vivienda, l'asignación crece en 4,2 millones.

Las cuentes recueyen una dotación de 180 millones pa polítiques de promoción económica, emplegu y investigación, destacando nesti apartáu l'impulsu de la fase inicial del proyeutu de tresformación dixital de l'Alministración, que fai que'l presupuestu destináu a teunoloxíes de la información y les comunicaciones pase de 4 a 13,5 millones. A las polítiques d'I+D+i destinaránse 79,8 millones.

La Universidá d'Uviéu, tres la firma del modelu de financiación nuevu 2018-2020, contará con una partida de 130 millones, a los que s'añaden casi otros 7 n'aportaciones pa I+D+i y 2 más de les places venceyaes.

Aumenten los recursos pa la prevención de quemes

Les inversiones en tresportes, carreteres y puertos ascienden a 110,8 millones. D'esti mou, garantízase la continuidá d'obres de valor estratéxicu como los accesos al Hospital Universitario Central d'Asturies (HUCA), al Parque Empresarial Principáu d'Asturies (Pepa) y a la Zona d'Actividaes Loxístiques y Industriales d'Asturies (ZALIA), asina como inversiones nueves nos cais de Cuideiru, Navia, San Esteban y El Puntal (Villaviciosa).

L'apoyu a los conceyos algama los 167 millones y la dotación pa Desarrollu rural y Recursos Naturales, los 221. Asina, el Plan de Desarrollo Rural va disponer de 83 millones, mentes qu'aumenten los recursos pa la prevención de quemes, con unos 12 millones.

Otra manera, el Fondo de Cooperación Municipal pasa a 6,8 millones, y el Plan d'Obres y Servicios, que medra un 44 por cientu, hasta los 3.300.000 euros.

Semeya obra d'Armando Álvarez. Na imaxe, Carcedo entrega un pinchu colos Presupuestos Xenerales del Principáu d'Asturies pal 2018 a Pedro Sanjurjo, presidente de la Xunta Xeneral.