Podemos presenta una enmienda a la totalidá a los presupuestos y ufre la so retirada a cambiu de la gratuidá del ciclu de 0 a 3

Tolos grupos de la oposición presentaron enmiendes a la totalidá a los presupuestos del Gobiernu cola esceición única d’Izquierda Xunida (IX). La vía de la izquierda buscada por Javier Fernández queda frenada por Podemos, que sicasí ufre la posibilidá d’un alcuerdu a cambiu de la gratuidá del ciclu d’Infantil de 0 a 3 años.

Emilio León, voceru de Podemos, valoró en dos millones d’euros la cantidá necesaria pa qu’esti ciclu d’Infantil sía de baldre dende’l 1 de xineru. D’igual forma, demanda que se frene cualquier posibilidá privatizadora futura pa sofitar les cuentes del Executivu.

FSA y IX presentaren poco enantes d'estes declaraciones trés enmiendes parciales conxuntes. Una d’elles sumaba dos millones d’euros al proyeutu de presupuestos presentáu pa la financiación del ciclu Infantil de 0 a 3 años, lo que permitiría rebaxar el costu pa les families un 50 por cientu, dalgo que Podemos considera insuficiente.

El vienres a les 10 hores va comenzar el Plenu na Xunta Xeneral nel que se van aldericar y votar les enmiendes presentaes por Foro, Ciudadanos, Podemos y PP, formación esta última qu’afirmó que tuvo esperando hasta l’últimu minutu en busca d’un xiru de Javier Fernández pa repetir la fórmula emplegada l’añu pasáu p’aprobar los presupuestos. Los votos de Podemos son necesarios pa que’l Gobiernu pueda sacar alantres les cuentes y evitar una prórroga presupuestaria.

Na semeya, el secretariu xeneral Daniel Ripa y León.