El xueves detectáronse 562 contaxos de COVID-19

Hai que llamentar 15 muertes na xornada, la cantidá más alta de la tercer fola. Les restricciones nueves van llegar tamién a Salas esti domingu por entrar en riesgu estremu.

La Conseyería de Salú informó de 562 casos nuevos ayeri –los datos oficiales sumen 30 más que ponen el total en 592–. Son 15 más qu'ayeri y la segunda cifra más alta de la tercer fola.

El Serviciu de Salú del Principáu d'Asturies (SESPA) fixo 6.457 pruebes de diagnósticu d'infeición activa, polo que la tasa de positividá s'asitió nel 10,62 por cientu, menor que'l miércoles, cuando algamó'l 11,20 por cientu. A 7 díes, el porcentaxe ye del 10,73 por cientu, siguiendo una tendencia ascendente.

15 persones perdieron la vida esta xornada cola enfermedá causada pol coronavirus SARS-CoV-2: diez muyeres de 89, 88, 87, 87, 86, 83, 83, 78, 72 y 70 años y cinco homes de 93, 90, 82, 79 y 62, de los que dos teníen residencia nun centru de mayores. Ye la cantidá más alta de la tercer fola, superando los 11 del miércoles, y ponen el total de muertes nel andanciu en 1.507.

Hai hospitalizaes 481 pacientes con confirmación o sospecha de COVID-19, 9 menos que'l día anterior. Na UCI hai otros 91 ingresaos, 6 más que na actualización última.

Quince conceyos en nivel d'alerta 4+

El Gobiernu decretó a última hora d'ayeri el zarru perimetral y la entrada de les restricciones nueves per 14 díes en Salas dende'l domingu tres confirmar un escenariu de tresmisión comunitaria de coronavirus SARS-CoV-2 nel conceyu. Al tener menos de 10.000 habitantes, aplíquense nesti casu una valoración individual diferente a los territorios de más población.

Nesti momentu tán en nivel d'alerta 4+ Grau, Avilés, Castrillón, Corvera, Uviéu, Llanes, Cangas del Narcea, Gozón, Noreña, Xixón, Mieres, Samartín del Rei Aurelio, Ḷḷena y Ayer. Valdés sigue en peligru d'entrar en riesgu estremu nel casu de nun ameyorar los datos, una situación a la que se suma agora tamién Siero, mentes que Carreño yá acumula dos xornaes fuera de la rampla de salida.

Pa consultar la situación de tolos conceyos y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na imaxe, el Palaciu Valdés-Salas en Salas. Semeya obra de Denis Soria baxo llicencia CC BY-SA 3.0.