Comuníquense 475 casos de COVID-19 esti llunes

Carreño entra finalmente en nivel d'alerta 4+, con zarru perimetral y midíes dende'l xueves. N'Avilés, Castrillón y Corvera aplazáronse 24 hores les restricciones más dures.

La Conseyería de Salú comunicó 475 contaxos ayeri –los datos oficiales contabilicen 7 más non contabilizaos hasta los 482–. Son 142 más que'l domingu –anque s'informaren 333, la cifra global quedó en 332 por duplicidá de positivos–, lo que s'esplica pola mayor cantidá de pruebes feches nesta xornada última.

Asina la tasa de positividá ye inclusive menor: 10,77 por cientu ayeri por 11,54 del día anterior. A 7 díes, esta cantidá ye del 10,54 por cientu.

Na xornada hai que llamentar 12 muertes cola enfermedá causada pol coronavirus SARS-CoV-2: siete homes de 88, 84, 80, 80, 75, 75 y 74 años y cinco muyeres de 91, 90, 86, 83 y 78, de los que dos vivíen en residencies. Dende qu'entamó l'andanciu finaron un total de 1.542 persones.

Hai nestos momentos 574 hospitalizaos con confirmación o sospecha de COVID-19, 9 menos que'l domingu. Na UCI tán ingresaos 102 pacientes, 2 más que'l día anterior.

18 conceyos en riesgu estremu

Na tarde d'ayeri confirmábase que Carreño se sumaba a la llista de conceyos en nivel d'alerta 4+, con zarru perimetral dende'l xueves. Los otros 17 que tienen restricciones son Grau, Avilés, Corvera, Castrillón, Uviéu, Llanes, Cangas del Narcea, Gozón, Noreña, Xixón, Mieres, Samartín del Rei Aurelio, Ḷḷena, Ayer, Salas, Valdés y Siero, onde entraron a valir güei.

Mentes, activóse tamién esta xornada la prórroga de dos selmanes n'Avilés, Castrillón y Corvera con midíes más dures que nun s'apliquen hasta mañana, como'l pieslle de la hostelería sacante la venta a domiciliu o pa recoyer. Pa consultar la situación de tolos conceyos y les restricciones vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, control policial pa vixilar el cumplimientu del zarru perimetral n'Avilés.