Yá ta equí San Xuan
![Yá ta equí San Xuan Yá ta equí San Xuan](https://asturies.com/sites/default/files/fonte_engalanada_en_nueva.jpg)
La nueche del 23 de xunu, la Nueche San Xuan, ye máxica. Celebramos el solsticiu de branu y facemos cultu al fueu y al agua nesta folixa de raigañu celta, esti añu marcada pola ausencia de fogueres multitudinaries, anque aumenten les fontes engalanaes.
Esto ye porque munchos conceyos y coleutivos, al nun poder entamar quemes esta medianueche por cuenta l'andanciu, potencien esta otra tradición venceyada a esta fecha. Y ye que l'agua ye importante nos ritos d'esta xornada, cuando ye posible atopar la flor d’agua, que surde per un instante colos primeros rayos de sol de la mañana según la lleenda, trayendo amor, belleza y salú al que da con ella; tamién ye la nueche na que les xanes salen de les sos cueves, siendo posible veles nes fontes.
El fueu, sicasí, tamién va tar presente nes celebraciones de güei como cultu al sol, anque arrequexaes al entornu familiar. Pa conocer más detalles sobre la tradición de San Xuan pues consultar el nuesu reportaxe especial d'A la Gueta los Suaños calcando equí.
Tamién tienes a golpe de click el cuentu animáu 'L'encantamientu', que se desendolca en San Xuan.