San Xuan

San Xuan

La maxa enllena l’ambiente na nueche de San Xuan. Ésta ye una fecha enforma especial que se vien celebrando dende cuantayá y que destaca pola quema de fogueres. Equí esplicámoste bien qué significáu tien.

¿Qué ye la Nueche de San Xuan?

Ye una celebración que tien raigaños celtes, que recibía’l nome d’Alban Heruin, y na que se fai cultu al sol y al agua. Trátase d’una nueche máxica pa munches cultures, ente elles l’asturiana.

¿Qué se celebra?

El solsticiu de branu, esto ye, cuando’l sol ta nel so puntu más altu, pa pasar a descender nos meses próximos. Esta posición del sol fai qu’esta xornada sía la nueche más curtia del añu; el día con más lluz.

¿Cuándo ye?

La nueche del 23 de xunu, anque’l solsticiu de branu en verdá ye’l 20 de xunu. La razón d’esti cambiu foi la decisión de la Ilesia católica d’adaptar la folixa a San Xuan Bautista, al igual que fixo con otres munches fiestes paganes.

¿Qué rituales se faen?

Nesta xornada faense fogueres cola intención de dar más fuercia al sol. N’Asturies, éstes suelen asitiase cerca de puntos d’agua, como fontes o ríos, cola fin de purificar. Asina, la xente suel baillar alredor de la foguera y engalana les fontes nesti día. Tamién ye habitual que se bañe nel mar, fontes o ríos pa tener salú.

¿Por qué ye máxica esta nueche?

La tradición asturiana atribúi a la Nueche de San Xuan aspeutos máxicos. Por exemplo, esta nueche salen de les sos cueves les xanes, muyeres de muncha belleza y llarga cabellera rubia a les que se pue ver nes fontes esti día. Éstes poseen importantes ayalgues a la que podrán acceder quién consiga desencantales. Tamién ye posible ver la flor d’agua, que naz per un instante colos primeros rayos de la mañana. Ésta trae amor, belleza y salú.

¿Cómo puedo celebrala?

Vete a la foguera que se faiga nel to barriu o na to ciudá cola to familia, disfruta y espera acontecimientos… Esta ye una nueche máxica de verdá; en San Xuan pue pasar cualquier cosa.

Dalgunos refranes

L’orbayu per San Xuan quita’l vinu y nun da pan.
Quien nun salló per San Xuan, da muestres de folgazán.
Dende San Xuan a San Pedru van cinco díes y mediu.
El día de San Xuan, quiebra la pata'l pan y el día de Santa Marina, da-y cola focina.
El día de San Xuan, salen les xanes a bailar.
El que cueya arestín la mañana de San Xuan, nun lu pica la culiebra nin nengún otru animal.
El que quiera bon pollu y bona gallina, que los eche en San Xuan y los saque per Santa Marina.
En San Xuan, al sol quema'l pan.
Per San Xuan, tanto queixu como pan.
Per San Xuan, la sardina mueya’l pan.
Per San Xuan, marcha’l cuquieḷḷu y vien el tabán.
Per San Xuan, nun quites el gabán.
Per san Xuan, seca la raíz el pan, per San Pedro raíz y tuero.
Per San Xuan too ye pan, y pela Madalena, pan y avena.
Per San Xuan, vienen los maquetos, per San Xuan vienen y se van.
Per San Xuan, ablana en pan; pela Madalena, ablana llena y per San Roque, se recoge.
Per San Xuan, ayos al desván.
Per San Xuan, quemó la vieya'l telar.
Per San Xuan, quiebra'l primer frutal, per San Pedru'l del mediu, y per Santa Sabel vamos a él.
Rellampaos per San Xuan, castañes los pagarán.
San Xuan de les uves, qué tarde vienes y qué poco dures.
San Xuan de venida, primavera dida.
Si llueve per San Xuan, encama’l pan.
Si vas a San Xuan, lleva pan, qu'ellí nun te lo dan.

Puedes conocer más refranes asturianos y el so significáu nesti llibru de Xulio Viejo.