Yá puen presentase proyectos pa la "Axenda Didáctica Escolar"

La Conseyería de Cultura pente medies de la Dirección Xeneral de Política Llingüística acaba dar anuncia de l'apertura del plazu pa la presentación de proyectos empobinaos a la "Axenda Didáctica Escolar" del presente cursu 2011-2012.

D'esta miente les persones, grupos musicales y compañíes teatrales con interés en participar na mesma y, pela cueta, nes actividaes que se desarrollarán nos centros educativos nos que s'imparte asturianu y gallego-asturianu, han de presentar un proyectu detalláu de la so actividá enantes del próximu 7 d'ochobre, faciéndose ente tolos proyectos presentaos una selección d’aquellos que meyor s’axusten a les iniciatives d’usu, promoción llingüística y apoyu al trabayu educativu.
Nel proyectu han apaecer, los oxetivos didácticos que se quieren algamar cola actividá, el material  que va necesitase pa trabayar nos centros y la duración, el tramu d’edá al que se dirixi, asina como un breve resume de l’actividá coles necesidaes materiales y espaciales de la mesma.
L'Axenda Didáctica Escolar axunta una riestra d'actividaes empobinaes a completar la formación de l'alumnáu que recibe clases d'asturianu y gallego-asturianu, bien seya na Educación Primaria como na Educación Secundaria y Bachilleratu. En pasaes ediciones tienen participao nella un total de 20.000 alumnos y alumnes, bien seya nes actividaes de calter lliterariu, musical o teatral.