Pop Piquiñín yá ta na cai

Esta selmana va entamar a distribuyise nos puntos de venta habituales "Pop Piquiñín", el nuevu discu de Petit Pop en llingua asturiana, asoleyáu por Araz Net, la empresa editora d'Asturies.com.

Esti trabayu ye una versión integramente n'asturianu del CD homónimu d'esti grupu que yá cuntaba con un tema n'asturianu occidental, "Patu Pachu ye un curíu". Agora, amás del Patu Pachu, los neños y neñes d'Asturies pueden disfrutar na nuestra llingua de les aventures de la formiga de Coceña, Panchetina, el Bichu Bola, la neña pirata, la vaca, les abeyes, o los animalinos de la Viesca, cola traducción de David Guardado.

El CD, grabáu nos estudios de Músicas de Sastre, edítase con llicencia Creative Commons y tien 12 temes, 11 yá apaecíen na versión en castellanu del CD y a ellos améstase-yos agora "Jota desesperá" nel que cuenten cola collaboración d'Herbamora. El discu tien una ayuda del Principáu d'Asturies, y na so edición y promoción collabora tamién l'asociación Reciella (families pol asturianu).

Nos próximos díes anunciaráse la so presentación nes vacaciones navidiegues, de la que s'informará n'Asturies.com.