Pintar-Pintar espón les sos publicaciones en Castrillón

"Libros, colores y letras" ye'l títulu de la esposición na que la editorial asturiana Pintar-Pintar fai un percorríu pelos sos llibros más conocíos dende'l so ñacimientu nel añu 2005.

La esposición, que podrá visitase nel Valey Centru Cultural de Castrillón hasta'l próximu 8 de xineru, va cuntar colos títulos n'asturianu Menú de Versos d'Ester García, Poemes de Carambelu de Marisa López Diz, Un monstruu ensin corazón de MªLuz Pontón. Asina mesmo tamién podrán vese, na so versión en castellán, dalgún de los títulos espublizaos n'asturianu pola editorial, ente ellos ¿De qué tará fecha la lluna? de Miguel Rojo, Deva y el pitín de Carmen Gómez Ojea o Cascoxu d'Aurelio González Ovies.
Pela so parte la esposición axunta los orixinales del álbum Cómo se hacen los libros escritu ya ilustráu por Ester Sánchez, que fuera premiáu nel añu 2008 col "Premio Nacional de Libro Infantil mejor editado".