Nuevos monstruos pa la reciella
La escritora asturiana MªLuz Pontón vuelve a confiar en Pintar-Pintar pa editar la so última historia "Un monstruu ensin corazón", historia que ta acabante de llegar a les llibreríes nesti mes de marzu.
El llibru, que se presenta en formatu d'álbum ilustráu, va acompañáu de les prestoses ilustraciones de la dibuxante d'orixen cubanu Iranidis Fundora. Ye ella la que-y da forma a unos personaxes que, en palabres de l'autora "val más invitalos a casa: dexa-yos un sitiu na cama, nel armariu y hasta nel bañu". Con esta naturalidá afronta Pontón la presencia de los monstruos y en xeneral el sentimientu de miéu qu'enllena les nuestres vides "intentando illuminar cola palabra l'escuru mundu de les tiniebles" argumenta.
MªLuz Pontón ye una de les escritores más prolífiques de la nuestra Lliteratura Infntil y Xuvenil, ente los sos llibros más recientes atópense "Quiero mercar una hermanina" o "¡Cómo te güelen los pies!".
Pela so parte Iranidis Fundora ñació en Cuba en 1975 onde estudió Pintura. Más llueu realizó estudios na Escuela d'Arte d'Uviéu.