Noticies a La Gueta

Alberto Ferrao y Berta Piñán nel VII Día de la Reciella

Anque l’orbayu acompañó al aniciu de la carrera ‘Entaína’, el tiempu respetó y el Día de la Reciella tornó a ser un ésitu, con cientos de persones acudiendo a lo llargo del día al Muséu del Pueblu d’Asturies. Ente elles, Berta Piñán, primer miembru del Conseyu de Gobiernu n’asistir a esta xornada nes sos siete ediciones.

Dorsales IV Entaína

Celébrase esti domingu nel Día de la Reciella.

Muga y el Corín de Reciella

El VII Día de la Reciella yá tien cantar. Depués de ‘Entaína’, ‘N’asturianu sumes’ y ‘¡Espoxiga!’ llega ‘¡Préstame pola vida!’, tema interpretáu pol dúu Muga, formáu por Alicia Álvarez y David Guardado, y el Corín de la Reciella que nun va dexar de sonar el domingu nel Muséu del Pueblu d’Asturies.

Entaína

El domingu 13 d’ochobre’l Muséu del Pueblu d’Asturies va enllenase de neñes y neños y los sos familiares pa vivir una xornada llúdica y festiva en llingua asturiana dafechu. Celébrase’l VII Día de la Reciella, que va abrir la IV Entaína, carrera de relevos que simboliza la tresmisión del idioma de padres y güelos a fíos y nietos.

El Pallabreru del Voleibol

El voleibol, tradicionalmente balón volea, ye’l deporte que protagoniza’l pallabreru últimu asoleyáu pola Oficina de Normalización Llingüística de Xixón. Amás de dar a conocer esti deporte y el so vocabulariu específicu en llingua asturiana, esta obra busca otorga-y visibilidá a la muyer na práutica deportiva.

Dominó d'Animales d'Asturies

Acuto Xuegos ta acabante de presentar la so novedá última. Trátase d’un dominó con animales d’Asturies, que se suma a los dos rompecabeces y el xuegu de les pareyes asoleyaos por esta empresa que crea materiales en llingua asturiana pa la reciella.