Noticies

La Oficina de Normalización Llingüística de Xixón edita un trípticu pa dar a conocer a los escolinos la importancia de los idiomes minoritarios

Con motivu de les celebraciones al rodiu del Día Internacional de la Llingua Materna, la Oficina de Normalización Llingüística de Xixón editó un trípticu pa dar a conocer a los escolinos la importancia de los idiomes minoritarios d’Europa. Ésti lleva’l nome de ‘Dos son más qu’ún, meyor sumar’.

La Estaya de la Llingua d’Avilés entama actividaes infantiles a lo llargo del añu en collaboración con Reciella

Caracol Teatru, col montaxe de marionetes ‘La viesca de piruletes’, va abrir esti vienres el ciclu d’actividaes infantiles ‘La Reciella de la Factoría’. Trátense de seis xornaes a lo llargo del añu entamaes pola Estaya de la Llingua d’Aviés en collaboración con ‘Reciella. Families pol Asturianu’.

'El requexu de los escolinos’ amazcárase

Tamos celebrando l’Antroxu y ‘El requexu de los escolinos’ nun quería perder esta folixa tan prestosa. Asina, incorpora un especial con dibuxos de llectores y de los alumnos del Colexu Rural Agrupáu Pintor Álvaro Delgado d’Outur. ¡Unvíanos les tos creaciones!

Reciella llega a un alcuerdu col Conceyu de Carreño pa entamar una programación infantil n’asturianu que va estrenar Cellero con 'Mitoloxíes'

Un alcuerdu de collaboración ente ‘Reciella. Families pol Asturianu’, el Conceyu de Carreño y el Teatru Prendes va permitir l’entamu d’actividaes pa neños y neñes de manera periódica en Candás. Nesti mes va celebrase un eventu musical y otru de teatru, ésti últimu previstu pa esti sábadu.

‘El requexu de los escolinos’, que suma dibuxos nuevos, prepara un especial d’Antroxu

Queda una selmana pa la llegada del Antroxu y ‘El requexu de los escolinos’ de ‘A la gueta los sueños’ quier celebralo con un especial. Asina, yá podéis unvianos los vuesos dibuxos y testos sobre esta folixa tan prestosa pa incorporalos a esta seición que ta acabante de recibir dellos trabayos.

L’Asociación Cultural Garabuxada homenaxó a los embaxadores de L’Anguleru

L’Acuariu de Xixón acoyó esti domingu una gala pa homenaxar a los embaxadores de L’Anguleru. D’esta forma, l’Asociación Cultural Garabuxada pretende reconocer el llabor de difusión de la figura d’esti personaxe navidiegu.

L’Anguleru: “Nunca recibiéramos tantes cartes nin tantos mensaxes de cariñu y sofitu como esti añu ¡Habrá regalos pa toos y toes!”

Queda poco pa la llegada de L’Anguleru, que yá navega n’agües del Cantábricu. Pese a que’l trabayu en L’Angulina ye continuu, el personaxe navidiegu favoritu de los neños y neñes asturianes tuvo tiempu p’atendenos al teléfonu pa esta entrevista.

'A la gueta los sueños' festexa la Navidá con un reportaxe sobre esta celebración y cola estrena de la seición ‘El requexu de los escolinos’

Avérase la Navidá y con ella llega tiempu d’estrenos en ‘A la gueta los sueños’. Asina, los usuarios d’esta revista dixital infantil van poder conocer el significáu de la celebración y les tradiciones d’estes feches nun reportaxe, asina como disfrutar d’una seición nueva, ‘El requexu de los escolinos’, con un especial sobre L’Anguleru con dibuxos de neños y neñes de Piloña, Tinéu y Castrillón.

El festival d’artes escéniques ‘Escenines pa la Reciella’ ufre cuatro espectáculos esta Navidá

El II ‘Escenines pa la Reciella’ principia esti llunes col cuentacuentos ‘Coses de neños’ que protagoniza Olga Cuervo. Ésta va ser la primer de les cuatro sesiones que ‘Reciella. Families pol Asturianu’ entama estes Navidaes nel salón d’actos del xixonés Colexu Públicu Xovellanos.

Los neños y neñes de Villamayor dieron les sos cartes pa L’Anguleru a un llendador del ríu

Averáse la Navidá y L’Anguleru yá ta navegando hacia Asturies pa pescar angula y convertir los beneficios de les ventes en regalos. Los neños y neñes de Villamayor pudieron entregar esti vienres les sos cartes a un llendador del ríu, collaborador d’esti personaxe navidiegu.

You are here