Nicasio allegró la entrega de premios del III Requexu Lliterariu El Xarabatu

 III Requexu Lliterariu El Xarabatu

L’osu Nicasio foi la gran novedá de la entrega de premios del III Requexu Lliterariu El Xarabatu. Les premiaes –toes neñes–, al igual que los finalistes, llevaron un diploma de recuerdu pola so participación nel concursu de testu y dibuxu llavianés.

La Casa Cultura de La Pola Llaviana acoyó’l pasáu 27 d’abril la gala, que presentó Pablo Carrera y que contó cola representación d’una obra a cargu del Grupu de Teatru La Cascaya. Toles gallardonaes xubieron al escenariu a recoyer el so reconocimientu ente los aplausos del públicu presente y la mirada de Nicasio, osu de cartón que s’estrenaba nel eventu y que causó sensación ente la reciella.

El concursu, entamáu por El Xarabatu, con René Durán a la cabeza, taba dividío en dos estayes, lliterariu y dibuxu, y éstes en trés categoríes: primeru y segundu de Primaria, terceru y cuartu, y quintu y sestu. Los testos ganadores foron ‘El raposu y el páxaru’, de Dana Rubio; ‘Folixa d’amarutes’, de Mariola Barbón; y ‘El llaberintu de los suaños’, de Carmen Lázaro, de manera respeutiva.

Mentes, los meyores dibuxos foron ‘Super Lili escontra’l cuélebre’, de Lucía García Fernández; ‘Los perros y la neña’, d’Irene Martínez; y ‘El mio güelu’, d’Andrea García García. Toes elles son escolines del colexu Elena Sánchez Tamargo, a esceición de García García, qu’estudia nel Maximiliano Arboleya, de Los Barreros, y llevaron como recompensa llibros y dellos materiales educativos.