Entréguense los premios del III Requexu Lliterariu El Xarabatu

La Casa Cultura de La Pola Llaviana acueye esti vienres l’actu d’entrega de premios del III Requexu Lliterariu El Xarabatu, dirixíu a les escolines y escolinos de los colexos Elena Sánchez Tamargo y Maximiliano Arboleya, de Los Barreros. Ésti cuenta tanto con estaya de rellatos como de dibuxu.

El Xarabatu, con René Durán a la cabeza, entama per tercer añu esti concursu que tien l’oxetivu “incentivar a los neños a la escritura, a la imaxinación, al dibuxu, demostrando que la Llingua Asturiana ta más viva que nunca y que tien futuru, amás de romper cola xeneralidá de los concursos solo en castellán”. D’igual forma, escúeyese la cercanía cola Selmana de les Lletres Asturianes pal entamu d’esti eventu cola intención de da-y visibilidá en Llaviana a esta celebración.

Ediciones Trabe, l’Academia de la Llingua Asturiana, Iniciativa pol Asturianu, Formientu, la Direición Xeneral de Planificación Llingüística y Normalización, el Serviciu de Normalización Llingüística de Llaviana, la Llibrería Arvin, el Grupo A Mansalva y el Grupu de Teatru La Cascaya, que pon una actuación nel actu d’entrega d’esta tarde, collaboren con esti proyeutu al traviés de llibros y material que s’entrega como premiu a los ganadores, trés en cada estaya. El xuráu que decide a los merecedores d’estes recompenses son, nesta ocasión, Inaciu Galán, Ana Isabel Medina, Ánxel Llano, Nel Morán, Miguel Allende y Vanesa Gutiérrez.

El gaiteru Pablo Carrera va encargase de la presentación del eventu, que va comenzar a les 17 hores. Los asistentes van poder mercar un calendariu fechu a manu pola organización –al igual que tol material asoleyáu por El Xarabatu que se va regalar a la reciella– cola fin d’afrontar los pagos d’impresión, y facer una semeya con Nicasio, osu de cartón que va convertise nel favoritu de les ñeñes y neños de Llaviana.