Montserrat Garnacho gana'l Xosefa Canellada con un testu teatral

El xuráu aconceyáu nel conceyu de Cabranes, llugar de naciencia de MªXosefa Canellada, alcordó esti día entregar el premiu que lleva'l so nome al testu de Montserrat Garnacho "A pespunte".

El Premiu, concedíu pola Conseyería de Cultura y Turismu del Principáu d'Asturies, ta empobináu a los testos de Lliteratura Infantil y Xuvenil de cualesquier xéneru escritos en llingua asturiana. Nes pasaes ediciones resultaren ganadores Berta Piñán pol poemariu "Arroz, agua y maíz" ya Ismael González Arias pola novela xuvenil "Les puertes del paraísu" qu'acaba d'espublizase. González Arias, conxuntamente col restu del xuráu presidíu pola Directora Xeneral de Política Llingüística, Consuelo Vega Díaz, y cola participación del alcalde de Cabranes, Alejandro Vega Riego, y de los tamién escritores Maite González Iglesias y Miguel Rojo; aconceyaron a les 11.00 hores d'esta mesma mañana na Casa Cultura de Santolaya de Cabranes pa dar a conocer el fallu.
Ente toles obres presentaes, un total de seis, el xuráu decidió por unanimidá conceder el Premiu al testu de Garnacho presentáu sol alcuñu de "Petra Molaguero", al valorar que se trata d'una obra teatral onde se recupera, revisa y actualiza la tradición oral de manera que ye p'averala a neños y neñes d'anguaño. Una obra, d'otra banda, que cuenta con gran aplicación didáctica nes aules, escrita con voluntá d'estilu y nun asturianu mui prestosu.
Montserrat Garnacho Escayo nació en Mieres del Camín nel 1952. Llicenciada en Filoloxía Románica, ye profesora de Llingua y lliteratura española mesmo que de Llingua asturiana. A ello añédese la so trayectoria como escritora y cuentacuentos, con participación en bien d'actividaes venceyaes col fomentu de la llectura fuera y dientro de les escueles. A ello hai qu'axuntar trabayos de calter etnográficu y la collaboración como articulista en periódicos y revistes de toa mena.