Los diez finalistes del IV 'Sácame pola pinta' busquen la victoria na gala final

Esti vienres el Teatru Nuevu de La Felguera acueye la gala final del IV 'Sácame pola pinta' de la edición dedicada a menores. Esti concursu, que tien como premiu la grabación d’un discu promocional nun estudiu profesional, consiste na imitación d’un artista asturianu.

Quince yeren les propuestes pa la edición d’esti añu, a la que se presentaron 27 concursantes, y diez son los que van tener presencia na final. En concreto Mapi Quintana, imitada por Pilar González; Silvia Quesada, por Xana Martínez; Víctor Manuel, por Lucas Santiango; Paula Rojo, por Paula Tauriño; La Pastorina, por Irene Álvarez; Tino Casal, por Pablo Menéndez; Vicente Díaz, por Lucía Díaz; Raquel del Rosario, por Ainhoa García; Marisa Valle Roso, por Lucía Fernández; y Chus Pedro, por Simón Buelga.

Ramón Blanco, Ana Morán y David Varela conformen el xuráu que va decidir el ganador del IV 'Sácame pola pinta', que va llevar como recompensa la grabación d’un discu promocional con cuatro cantares del artista imitáu nun estudiu profesional acompañáu d’un instrumentu que va tener una tirada de cien copies en formatu CD en caxa de cartón. El cuartu miembru del xuráu va ser el propiu públicu, que va poder votar per redes sociales.

La gala, entamada pol Grupo A Mansalva y encuadrada nel Salón de Navidá de Llangréu, va comenzar a les 20 hores y la entrada ye llibre hasta completar aforu. TPA va televisala en diferío’l xueves dende les 22.14 hores.

Na semeya, Celia Corrales, ganadora de la edición pasada pola so imitación de Luz Casal.