Los cuentacuentos n'asturianu tornen esta seronda a Xixón

La rede de biblioteques públiques de Xixón recupera, cola llegada de la seronda, los cuentacuentos n'asturianu. Éstos tán destinaos a neños y neñes d'ente 4 y 10 años.

Pa participar nesta actividá, que ye de baldre, ye necesario acutar plaza previamente, yá que cada sesión tien un tope de 25 persones. Pa ello namái ye necesario contar con Tarxeta Ciudadana y meter los datos nesti enllaz.

'La hora de los cuentos n'asturianu' ye una actividá qu'entama la rede de biblioteques xunto cola Oficina de Normalización Llingüística na que la reciel "va poder esfrutar de prestoses histories n'asturianu y conocer la lliteratura que se ta faciendo anguaño na nuestra llingua". Les sesiones previstes, siempre a les 18 hores, son les siguientes:

• Biblioteca de La Camocha, llunes17.
• Biblioteca de L'Arena, martes 18.
• Biblioteca de La Calzada miércoles 19.
• Biblioteca d'El Coto, xueves 20.
• Biblioteca d'El Llano, llunes 24.
• Biblioteca de de Contrueces, martes 25.
• Biblioteca de Pumarín-Xixón Sur, miércoles 26.
• Biblioteca d'El Polígono, xueves 27.