Etenko y los patines maraviosos

Etenko y los patines maraviosos

Nome: ‘Etenko y los patines maraviosos’

Testos: Vicente García Oliva

Ilustraciones: Ester Sánchez

Editorial: Pintar-Pintar

ISBN: 978-84-92964-91-8

La imaxen que la lliteratura clásica vieno dando de les neñes ye’l reflexu que la propia sociedá tien d’elles: unos seres xeneralmente pasivos, secundarios, ayenos a la épica y al protagonismu reserváu namás pa los varones. Esti estereotipu sigue tando mui afitáu nes tres cuartes partes del mundu, África, Asia, Llatinoamérica ya inclusive nesi llamáu “primer mundu” nel que’l percorríu vital y profesional de les moces sigue teniendo trabancos pa poder llegar a lo más alto. Pesie a ello, y de la mano de dellos grandes escritores, tamién la lliteratura ufierta otros modelos de neñes llistes, ocurrentes, innovadores, contestataries, lluchadores escontra unos modos de vida que les minusvaloren. Alicia, Pippi, Matilda… podríen ser unos exemplos d’eses mocines que quieren ser tamién protagonistes de les sos propies vides y son capaces de salise d’esi papel que construyeron pa elles. Etenko suaña con patinar, con esnalar, con salise d’esa realidá que la empequeñez. Etenko sabe qu’hai que lluchar escontra munches lleis, inclusive escontra esa que nos amarra a la dura tierra: la llei de la gravedá. Por eso los suaños d’Etenko son tan importantes, porque l’ayuden a construyir otru mundu alternativu que, pa que pueda esistir, primero hai qu’imaxinar. Etenko nun necesita falar pa facenos suañar a nosotros tamién.