Los cantares de ‘Bestiariu’ repiten dientro de los Alcuentros de Músiques Asturianes, agora n’El Llano / ÚLTIMA HORA: Aplazáu por temes de salú

Alicia Álvarez y David Varela tornen a llevar los cantares de ‘Bestiariu’ al ciclu Alcuentros de Músiques Asturianes, esti añu dedicaos a los cantautores. El Centru Municipal Integráu d’El Llano va acoyer esi miércoles una actuación na que van sonar dalgunos de les temes sobre animales de los trés discos asoleyaos.

‘Bestiariu’ ye un proyeutu nel qu’artistes y grupos asturianos ellaboraron cantares sobre la sacavera, el ratu, el catasol, la vacalloria, el gochu, el burrín, el xilgueru, el ñerbatu, el llobu, l'oriciu, l’hipopótamu, la raposa, la xaronca, el cocu, la lleona o l’esperteyu, ente otros munchos animales. Tres él ta La Fabriquina, qu’asoleyó trés discos con edición d’Araz –empresa editora tamién de 'A la Gueta los Suaños'–, col oxetivu d’averar l'asturianu al públicu infantil y crear materiales orixinales nuevos pa neñes y neños nesta llingua.

Mañana, a les 18 hores nel salón d’actos del CMI d’El Llano, éstos van poder disfrutar d’una esbilla de los mesmos interpretaos por Alicia Álvarez y David Varela que yá se pudo sentir el pasáu día 30 d’ochobre en La Calzada. La entrada ye llibre hasta completar aforu.