"Lo meyor de facer un llibru a comuña ye que nun decides solu hacia ónde va la historia"

Esti domingu 18 de setiembre Xurde y David Fernández presentarán la so nueva obra de creación "Antón quería ser porteru" nel marcu de L'Arribada, en Xixón. Falamos con ellos del llibru y otres cuestiones venceyaes a la lliteratura pa la reciella

“Antón quería ser porteru” ye’l títulu del so últimu llibru ¿por qué facer un llibru pa neños y neñes que xire al rodiu del mundu del fútbol?
Xurde Ferández: De neñu’l fútbol yera lo más importante de la mio vida xunto cola bicicleta que nun paraba de caminar tolos sábados lo que nun caminaba’l  restu la selmana. Tolos díes depués de salir de clas pela mañana, depués de salir de clas pela tarde xuntábemonos dellos nuna cancha que teníemos mui cerca casa, enllena de peñes, pa pega-y pataes a un balón,  pa suañar que yéremos xugadores del Sporting.
David Ferández: Pásame un poco lo mesmo. Cuando yera neñu too xiraba al rodiu del fútbol. Salíes de clas y namás pensabes en dir xugar a la pista de “Ojeda”. Nesi tiempu na tiesta namái había la posibilidá y el deséu de ser futbolista de mayor y en Candás, toos somos del Sporting.
 
Ye verdá que nel llibru hai una referencia clara al Sporting de Xixón ¿conoz el clú xixonés esta historia?
Xurde: Yo creo que sí, que la editorial púnxose en contautu col sporting pa conta-y lo que tábemos faciendo.
David: Según sabemos, la idea de la editorial yera que'l llibru pudiere salir como productu oficial del clú, pero'l por qué de que nun se ficiere nun lu sabemos.
 
Antón nun quier ser delanteru, nin defensa, nin entrenador, tien clarísimo que quier siguir los sos pasos d'un históricu del Sporting, Ablanedo, y ser porteru ¿por qué?
Xurde: Yo medré xugando de porteru con una portería fecha con peñes y cazadores, medré suañando con tolos porteros del Sporting, pero sobre manera con Ablanedo namás comparable al otru gran ídolu que tuvi de neñu, Arkonada.
David: Tamién na nuestra casa toos fueron porteros, mio pá y el mio hermanu como diz y yo tamién entamé nesa posición. Podemos dicir que venimos d'una saga de porteros, anque mio pá me quitó pronto esa idega y dexé la portería pola delantera. Ablanedo apaez porque crecimos viéndolu na portería del Sporting y porque yera un ídolu en casa.

Ye esti un llibru escritu en comuña y, nel casu de Xurde, nun ye la primer vez qu’edita un llibru d’esta miente. Ensin dir más p’allá esti mesmu añu asoleyara con Suburbia Ediciones otru álbum de lliteratura infantil y xuvenil acompañáu de Marián García “El árbol de la verdá” ¿Qué tien d’especial la escritura a cuatro manes?
Xurde: La principal ye que nun yes tu solu’l que decides lo que-yos va pasar a los protagonistes sinón qu’hai otra persona, que dacuando nun ve les coses como tu, cola que discutir hacia ónde va dir la hestoria.
David: Ye una esperiencia bona porque a cuatro manes salen más idegues  y cuatro güeyos ven meyor que dos. Amás trabayar col to hermanu siempre presta.

Falamos d’un llibru escritu a cuatro manes pero, al tratase d’un álbum ilustráu, cásique podríemos dicir a seis ¿qué valoración faen de les ilustraciones de Francisco Pimiango?
Xurde: Desque vi per primer vegada los dibuxos nun tengo palabres pa falar de
les ilustraciones porque hai dalgún que ta claváu a lo que nosotros esperábemos. Entá nun conozo a Francisco, conocerélu na presentación del domingu, pero les primeres palabres van ser pa da-y les gracies por amosar el nuesu pensamientu.
David: Pásame lo mesmo, pa los dibuxos nun tengo palabres. Namás velos díxi-y a Xurde que yera lo que queríemos.

David Fernández ta iniciándose na espublización lliteraria n’asturianu cola so collaboración en diverses revistes y la participación en certámenes lliterarios como’l recientemente convocáu de la FNAC. Pela so parte Xurde lleva percorríu un camín más llargu, a lo meyor por eso de ser l’hermanu mayor ¿qué proyectos lliterarios tienen agora en mente? ¿van siguir pel camín de la lliteratura pa la reciella?
Xurde: El primer proyeutu ye descansar d’un añu complicáu pero de xuru que vendrán histories pa neños y histories p’adultos, histories a dos manes y histories a cuatro manes.
David: La mio idega ye siguir escribiendo y presentándome a dalgún concursu lliterariu que ye lo que más me presta. Dempués quiero ver si salen p'alantre dellos trabayos que tengo pa neños y non tan neños y una novela xuvenil que tengo a medies.


Pa cabu toca facer una valoración global de la Lliteratura Infantil y Xuvenil
¿qué perspectives podemos adelantá-y al xéneru?
Xurde: Hai que siguir trabayando muncho. Idees hailes, perres non munches y apoyu institucional cuasi nengún cuando de xuru ye pernecesario pa facer más visible la Lliteratura Infantil y Xuvenil n’asturianu na educación quiciabes al traviés de la compra de llibros pa les biblioteques escolares que tán, no que cinca al asturianu, casique desfasaes.
David: El xéneru tien un garrapiellu de xente detrás que ta trabayando por ello con muncho enfotu y con obres de muncha calidá, pero'l problema, como diz Xurde, ta na alministración que nun suelten nengún euru pa sacar alantre la lliteratura n'asturianu.